Read Nguna Togoa Etafe North SALAMO 107 Bible Online

SALAMO 107 - Nguna Togoa Etafe North bible

SALAMO 107

¹Kuga vasap̃ia ki Yehovah; nalakena e p̃ia: Nalakena nadodomiana aneana e du mau du.

²Tea tauluaana maga ki Yehovah euga noa e, Waina e daulua ra m̃elu dua ki nam̃elearu ni tea kokona;

³Po piragi‐saisai ki da m̃elu dua ki navanua maga, Pae ist go pae west, Pae north go pae natasi.

⁴Eu surata sasap̃o masop̃alo pae napua waina e pei maso maladi; Eu da pap̃ai te natokoana waina euga toko asa doko mau.

⁵Eu pitolo go eu madou, Naatada e matekimala ara.

⁶Go eu pioso paki Yehovah doko nariesoki‐ra‐ana, Go e do pualua ra m̃elu dua ki nap̃alaasa adeada maga.

⁷Go e maraki ra pae napua leana, Naga euga vaki natokoana waina euga toko asa doko.

⁸Euga vasadodom̃ata ki Yehovah nalakena nadodomiana aneana, Go nawosiana ni namagaana aneana maga paki naatam̃oli natuda maga!

⁹Nalakena e do mari naatana madou e maro, Go e do pakavuro naatana pitolo ki tea wia.

¹⁰Tea maga waina eu do doko namaligo go melu ni namateana, Tea soliana maga ni narogokitesaana go ni airon;

¹¹Nalakena eu marip̃auluulu paki nanoaana maga ki Sup̃e, Po pasadao namidoakip̃otaeana ki Tea Vakilagi mau:

¹²Go e mari nap̃op̃oda e pakitano ki nawosimawosaana; Eu dapilagona, go tea silae e da doko mau.

¹³Go eu pioso paki Yehovah doko nariesoki‐ra‐ana, Go e do mautipauri ra m̃elu dua ki nap̃alaasa adeada maga.

¹⁴E do piragilua ra m̃elu dua ki namaligo go melu ni namateana, Go e do puakotovi natali adeada maga.

¹⁵Euga vasadodom̃ata ki Yehovah nalakena nadodomiana aneana, Go nawosiana ni namagaana aneana maga paki naatam̃oli natuda maga!

¹⁶Nalakena e marip̃oraworae namatapua maga ni brass, Po daekotokotovi tea walagoto maga ni airon.

¹⁷Tea vei lala maga nalakena napua ni natapiriana adeada, Go nalakena namarinaleotageleana adeada maga, eu do pei tea mariana eu dogo kite sa.

¹⁸Naatada e do mamadago ki sara navinaga kaniana; Go eu do paki m̃aladigi ki namatapua maga ni namateana.

¹⁹Go eu do pioso paki Yehovah doko nariesoki‐ra‐ana, Go e do mautipauri ra m̃elu dua ki nap̃alaasa adeada maga.

²⁰E do dip̃akilua navasaana aneana, po do maripauri ra, Po do pualua ra m̃elu dua ki namarisaki‐da‐ana maga.

²¹Euga vasadodom̃ata ki Yehovah nalakena nadodomiana aneana, Go nawosiana ni namagaana aneana maga paki naatam̃oli natuda maga!

²²Go euga vitua ki naviriana maga ni navasadodom̃atakiana, Po do dogorogo ki nawosiana aneana maga ki nalega‐laelaeaana.

²³Tea maga waina eu do siwo natasi shipe maga, Waina eu do mari nawosiana noai warua maga;

²⁴Nara eu punusi nawosiana maga ki Yehovah, Go tea ni namagaana aneana maga epua.

²⁵Go e pitip̃aki, go nalagi atu sikai e duleana, Go e sike napeao aneana maga pakilagi.

²⁶Eu do sake paki nakoroatelagi, eu do siwo paki epua maga: Naatada e do sara nalakena nasaana.

²⁷Eu do dalitaliepu, po do darataara dapala tea matamaloku sikai, Go namanumatuaana adeada e pei tea tinomiana puti.

²⁸Go eu pioso paki Yehovah doko nariesoki‐ra‐ana, Go e do piragilua ra m̃elu dua ki nap̃alaasa adeada maga.

²⁹E do mari naatugiana e dam̃ate, Go napeao adeada maga eu do punuta.

³⁰Go eu do laelaea nalakena eu dam̃ate doko; Go e do maraki ra paki nawora masauana adeada.

³¹Euga vasadodom̃ata ki Yehovah nalakena nadodomiana aneana, Go nawosiana ni namagaana aneana maga paki naatam̃oli natuda maga!

³²Go euga vasasike pakilagi ki nia nasaisaiana ki narei, Po samasamani a natasakedokoana ki tea matua maga.

³³E do mari noai sara maga eu pei masop̃alo sikai, Go namata ni noai maga eu pei maso madou sikai;

³⁴Navanua ni nawa sikai e pei tea ni natasimena sikai, Nalakena nasigisigileoana ki tea maga waina eu doko asa doko.

³⁵E do mari masop̃alo sikai e pei namarourou ni noai sikai, Go navanua garagara sikai e pei namata ni noai maga.

³⁶Go e mari tea vitolo maga eu doko tokora wanogoe, Go eu lawokilaketoko natokoana sikai waina euga toko asa doko;

³⁷Go eu sapura ki vanua maga, po lawo roara ni vaine maga, Po mari nawa ni nataluaana.

³⁸Go e pasap̃ia ki da, go eu po laapa p̃arua; Go e da mari katel adeada eu pisa maau mau.

³⁹Go eu pei tea mariana eu pisa maau po kolo pakitano. Nalakena nariesokiana, nasaana, go nasusueana.

⁴⁰E do da ki namidoakip̃alokiana paki tea maraki maga, Go e mari ra eu surata sasap̃o masop̃alo sikai, waina napua e dika asa.

⁴¹Go e sike tea tika pakilagi m̃elu dua ki narogokitesaana, Po mari a e pei naworana maga dapala navata sikai ni shiip go naninani.

⁴²Tea leana maga euga wo punusi a, po laelaea; Go sara namarinaleotageleana euga wo p̃ogoro nawokada.

⁴³Sei e manumatua go ega wo pavaigoro tea maga wanogoe. Go euga wo midoakiusiusi nadodomiana maga ki Yehovah?