Read Nguna Togoa Etafe North SALAMO 108 Bible Online

SALAMO 108 - Nguna Togoa Etafe North bible

SALAMO 108

¹Nalegaana sikai, Salamo sikai ki David. Nap̃op̃ogu e pei tea lawokilaketokoana, Sup̃e O; Aga wo lega, go aga wo legasamasamani, kinami ma nasamasamamaana aginau.

²Koroga tarapa, salteri go harp: Aga wo pulevule ragi ni namakotokotoana.

³Aga wo pasadodom̃ata ki‐go, Yehovah O, m̃aleoputo ni narei maga: Go aga wo lega‐samasamani ko m̃aleoputo ni nalauna maga.

⁴Nalakena nadodomiana anigo e p̃arua pae elagi ki nakoroatelagi maga: Go nalomauana anigo pa pa paki napopouru maga.

⁵P̃a vei tea vakilagi dap̃au nakoroatelagi maga, Sup̃e O, Go nasamasamaana anigo ega vakilagi dap̃au maramana mamau.

⁶Naga tea dodomiana anigo maga euga vei tea vualuaana, P̃a mautipauri pae nam̃elearum̃a ni matua, go p̃a vasadara gami.

⁷Sup̃e e pasa doko natapuana aneana; aga wo darasa: Aga wo dap̃otae Shekem, po dowogi nap̃aloa ni Sukkoth.

⁸Cilead e pei aginau; Manasseh e pei aginau; Go Efraim e pei p̃aaka ni nap̃augu; Yudah e pei tiko ni naveinawotaana aginau.

⁹Moab e pei pot ni nasarueana aginau; Aga wo nadi ki nam̃elevasiana aginau paki Edom: Aga wo pioso‐laelaea nalakena Filistia.

¹⁰Sei ega wo piragi au paki natokoana ni p̃aaka? Sei e maraki au pa pa paki Edom?

¹¹Ku da dip̃adoa gami, Sup̃e O, kite? Go ku da dave, Supe O, sikoti taua aginami maga pano mau.

¹²P̃a tua gami nasilaeana pa dua ki tea riesoki: Nalakena namautipauriana ki naatam̃oli e pei tea m̃oli.

¹³Tuga wo marimatua pae Sup̃e: Go nae ega wo pasi tea maga waina eu diesoki gida.