Read Nguna Togoa Etafe North SALAMO 109 Bible Online

SALAMO 109 - Nguna Togoa Etafe North bible

SALAMO 109

¹Salamo sikai ki David. Sup̃e ni nasamasamaniana aginau, p̃a ta punuta mau;

²Nalakena eu p̃olagati nawoka sigisigileo sikai go nawoka ni namarisoreana dip̃a au: Eu pasa dip̃a au ki namena sikai ni nasorosoroana.

³Go eu dalivirigoro au ki navasaana maga ni navilosiana, Go eu mari navakalo dip̃a m̃oli ki nau.

⁴Eu marikokona paki nau dip̃a nadodomiana aginau: Ma kinau a do dapasavasa.

⁵Go eu doropusi doko au tea sa dip̃a tea wia, Go navilosiana dip̃a nadodomiana aginau.

⁶P̃a lawo ki tea sigisigileo sikai ega tap̃augoro e: Go Satan ega lawodu pisari nam̃elearuna ni matua.

⁷Ragi waina ega vei tea vasap̃otaeana ega wo pei tea tip̃akotoviana dave; Go natapasavasaana aneana ega wo pei namarinaleosaana.

⁸Naaleatia aneana maga euga visa maau; Tea p̃ota sikai ega tape naveitealeoparatikiana aneana.

⁹Natuna maga euga vei namalepu maga, Go anagoroi ega vei malepu sikai.

¹⁰Go natuna maga euga to pasarasara, po do datago; Go euga to laaga navinaga adeada uvea ki nasum̃a makaka adeada maga.

¹¹Tea vitua ki tea seakiana ega tape lua tea mamau puti waina e peani ra; Go tea ni namatarau p̃ota maga euga tapepavakoto nawosiana aneana.

¹²Te naata ega ta doko mau waina ega to maneana dosagi nadodomiana; Go te naata ega ta doko mau waina ega to saup̃ia ki namalepu aneana maga.

¹³Tea edakugoro e maga euga vei tea taeluaana; Nagisada euga vei tea kasiluaana tagona waina ega wo edakugoro e.

¹⁴Namarinaleotageleana ki tamana maga ega vei tea midoakiana paki Yehovah; Go namarinaleosaana ki p̃ilana ega ta pei tea kasiluaana mau.

¹⁵Euga toko kivea ki Yehovah sara ragi, Go ega taelua namidoa‐ki‐da‐ana m̃elu dua ki maramana.

¹⁶Nalakena e da midoa ki nia naga ega mari nadodomiana mau, Go e kopalele naatam̃oli waina e dogo kite sa go waina e pei tea tika, Go tea waina nap̃op̃ona e mawora, naga ega maripunue ra.

¹⁷Go e dodomi navasasakiana, go e umai paki nia; Go e da masau navasap̃iakiana mau, go e madu uvea ki nia.

¹⁸Go e suni navasasakiana dapala sugoro aneana, Go e umai dapala noai paki nap̃alauna, Go dapala naroro paki navatuna maga.

¹⁹Ega maneana dapala sugoro waina e dum̃ana kovagoro e asa, Go ega vei tasoki waina ega vei tea tasokiana asa sara ragi.

²⁰Tea wanogoe e pei namoriana m̃elu Yehovah paki tea maga waina eu do marikokona paki nau, Go paki tea maga waina eu pasa tea sa dip̃a naatagu.

²¹Ma nigo, Yehovah Nawota O, p̃a mari paki nau, nalakena nagisam̃a; Nalakena nadodomiana anigo e p̃ia, p̃a vualua au,

²²Nalakena kinau a dogo kite sa go a pei tea tika, Go nap̃op̃ogu e pei tea vuriana nap̃alaugu.

²³A pano dapala melu sikai ragi waina e pei tea saikiana: A pei tea varuvaruluaana dapala midiri.

²⁴Nap̃atuagu ero darataara nalakena navaliana; Go nap̃okasigu e dika nam̃aladua.

²⁵Go kinau a pei tea vasapinoakiana adeada: Ragi waina eu punusi au, eu do ligiligi ki nap̃auda.

²⁶P̃a silae au, Yehovah Sup̃e aginau O; P̃a mautipauri au ega vae nadodomiana anigo:

²⁷Go euga wo atae naga tea wanogoe e pei nam̃elearum̃a; Naga nigo, Yehovah, ku mari a.

²⁸Nara euga wo pasasaki, ma nigo p̃a wo pasap̃ia: Eu duleana, go euga wo maliere, go tea suasua anigo ega wo laelaea.

²⁹Tea maga waina eu marikokona paki nau euga wo pei tea sugoroana ki nadododaoana. Go euga wo pei tea kovagoroana ki namaliereana adeada dapala sugoro kovagoro sikai.

³⁰Aga wo pasadodom̃ata ki p̃arua ki Yehovah ki nawokagu; Go aga wo samasamani a m̃aleoputo ni tea laapa.

³¹Nalakena ega wo lawodu pisari nam̃elearu ni matua ni tea tika, Naga ega mautipauri a m̃elu dua ki tea maga waina eu do pasap̃otae naatana.