Read Nguna Togoa Etafe North SALAMO 112 Bible Online

SALAMO 112 - Nguna Togoa Etafe North bible

SALAMO 112

¹Kuga samasamani Yah. Ae namaropaana ki naatam̃oli waina e matau ki Yehovah, Waina e masau p̃arua ki natip̃akiana aneana maga!

²Naworaworana euga wo pei tea marimatua maramana: Tagona ni tea leana maga euga wo pei tea vasap̃iakiana.

³Naveaniana go nasogolapaana ero doko nasum̃a aneana: Go namarinaleoleanaana aneana e du mau du.

⁴Namarama e do magi tea leana maga pakilina namaligo: E saup̃ia, go e pei maritadodomi, go e leana.

⁵Naatam̃oli waina e do saup̃ia po do suasua‐ki‐pitua e doko p̃ia; Ega wo silae naleo aneana maga ki navasap̃otaeana.

⁶Nalakena ega wo da parivari mau pa pa ega tu mau du; Tea leana ega wo pei tea midoakiana pa pa ega tu mau du.

⁷Ega wo da mataku nalakena narogorogoana sa mau: Nap̃op̃ona e pei tea lawokilaketokoana, e do pavatu Yehovah.

⁸Nap̃op̃ona e pei tea silaeana, ega wo da mataku mau, Pa pa ega wo leopunusi tea kokona ki nia maga.

⁹E daperavera, e dua tea tika maga; Namarinaleoleanaana aneana e du mau du: Napati ni nap̃auna ega wo pei tea sikeana pakilagi ki nadodomadaganiana.

¹⁰Tea sigisigileo ega wo punusi a, go nap̃op̃ona ega wo sa asa; Ega wo kati napatina maga po sara: Namasauana ki tea sigisigileo ega wo puoli.