Read Nguna Togoa Etafe North SALAMO 113 Bible Online

SALAMO 113 - Nguna Togoa Etafe North bible

SALAMO 113

¹Kuga samasamani Yah. Kuga samasamani, tea suasua maga ki Yehovah O, Kuga samasamani nagisa ni Yehovah.

²Nagisa ni Yehovah ega vei tea vasap̃iakiana. Pae ragi waia pa pa go ega tu mau du.

³Pae nasakeana ni elo pa pa paki namusuana aneana. Nagisa ni Yehovah e pei tea waina ega vei tea samasamaniana.

⁴Yehovah e pakilagi dap̃au nalauna maga mamau puti, Nasamasamaana aneana e dap̃au nakoroatelagi maga.

⁵Sei e dakiusi Yehovah Sup̃e anigida, Waina e do dasake elagi,

⁶Waina e do dum̃ana doro e pakitano naga ega leopunusi Tea maga ni nakoroatelagi go ni maramana?

⁷E do sike tea manainai m̃elu dua ki nam̃otam̃ota, Ega wo sike tea tika ega vakilagi m̃elu dua ki natap̃ata;

⁸Naga ega mari a ega tasake sikoti tea maraki maga, Sikoti tea maraki maga ni narei aneana.

⁹E do mari nagoroi dim̃o ni nasum̃a e dasake, Po pei p̃ila ni natuna maga doko laelaea. Kuga samasamani Yah.