Read Nguna Togoa Etafe North SALAMO 115 Bible Online

SALAMO 115 - Nguna Togoa Etafe North bible

SALAMO 115

¹P̃a ta dua gami, Yehovah O, p̃a ta dua gami mau, Ma p̃a tua nagisam̃a nasamasamaana, Nalakena nadodomiana anigo, go nalakena nalomauana anigo.

²Ekasana nalauna maga euga naga, Sup̃e adeada wai, au pavara?

³Ma Sup̃e anigida e doko nakoroatelagi maga: E mari tea maga waina e masauna naga ega mari ra.

⁴Nasup̃e adeada maga eu pei silver go kold, Nawosiana ni nam̃elearu maga ni naatam̃oli maga.

⁵Nawokada e doko ara, ma eu da pasa mau; Namatada ero doko ara ma eu da leosai mau;

⁶Nadaligada ero doko ara, ma eu da dogo mau; Nagisuda e doko ara, ma eu da sidogo mau;

⁷Nam̃elearuda ero doko, ma eu da dovidogo mau; Nam̃eleda ero doko, ma eu da surata mau; Go eu da pasa masai ki namanuda mau.

⁸Tea maga waina eu mari ra euga wo dakiusi ra, Go sara naata waina eu pavatu ara.

⁹Israel O, p̃a vavatu Yehovah: Nae e pei nasilae‐ra‐ana go nakokoro adeada.

¹⁰Nasum̃a ni Aaron O, kuga vavatu Yehovah: Nae e pei nasilae‐ra‐ana go nakokoro adeada.

¹¹Tea maga waina ku matau ki Yehovah, kuga vavatu Yehovah: Nae e pei nasilae‐ra‐ana go nakokoro adeada.

¹²Yehovah e midoa ki gida; ega wo pasap̃ia ki gida: Ega wo pasap̃ia ki nasum̃a ni Israel; Ega wo pasap̃ia ki nasum̃a ni Aaron.

¹³Ega wo pasap̃ia ki tea maga waina eu matau ki Yehovah, Tea kiki maga sikoti tea warua maga.

¹⁴Yehovah ega to sokari mu, Nimu ma natumu maga.

¹⁵Nimu ku pei tea vasap̃iakiana ki Yehovah, Waina e mari nakoroatelagi go maramana.

¹⁶Nakoroatelagi maga eu pei nakoroatelagi maga agi Yehovah; Go e dua naatam̃oli natuda maga maramana.

¹⁷Tea mate maga eu da samasamani Yah mau, Go tea maga waina eu siwo paki navunutaana pano mau;

¹⁸Ma nigida tuga wo pasap̃ia ki Yah Pae ragi waia pa pa go ega tu mau du. Kuga samasamani Yah.