Read Nguna Togoa Etafe North SALAMO 116 Bible Online

SALAMO 116 - Nguna Togoa Etafe North bible

SALAMO 116

¹A dodomi Yehovah, nalakena e dogo Nadaleogu go navavaraniana aginau maga.

²Nalakena e da ki nadaligana paki nau, Go aga wo pioso paki nia naaleatia aginau maga.

³Namea maga ni namateana eu dalivirigoro au, Go navitinuana maga ni Sheol eu pap̃ai au: A pap̃ai nariesokiana go nasusueana.

⁴Go a pioso ki nagisa ni Yehovah: A pavarani ko, Yehovah O, p̃a vualua naatagu.

⁵Yehovah e saup̃ia, go e leana; Go Sup̃e anigida e pei maritadodomi.

⁶Yehovah e do pavaigoro tea manumatavusa maga: A pei tea viragiana pakitano, go e mautipauri au.

⁷P̃a liliu, naatagu O, paki namaromaroana anigo; Nalakena Yehovah e marim̃ata ki‐go.

⁸Nalakena ku pualua naatagu pa dua ki namateana, Namatagu maga pa dua ki naririmata maga, Nam̃elegu maga pa dua ki natosivakiana.

⁹Aga wo surata narae ni Yehovah Navanua maga ki tea mauri maga.

¹⁰A saralomau, nalakena aga wo pasa: Kinau a dogokitesa p̃arua:

¹¹Kinau a noa ragi waina a mataku, a naga, Naatam̃oli maga mamau puti eu pei tea sorosoro.

¹²Aga wo dua Yehovah nasava liliu. Nalakena namarim̃atakiana aneana maga paki nau?

¹³Aga wo dape dakati lasa munu ni namautipauriana, Go aga wo pioso ki nagisa ni Yehovah.

¹⁴Nasaiana aginau maga paki Yehovah aga wo lagati dua e ara, Aga mari a kivea ki narei aneana mamau.

¹⁵Namateana ki tea dodomi‐dodomiana aneana maga. E pei tea madaga namata maga ni Yehovah.

¹⁶A pavarani ko, Yehovah O, nalakena kinau a pei tea suasua anigo: Kinau a pei tea suasua anigo, natu ni tea suasua nagoroi anigo; Ku peresi natali solisoli aginau maga.

¹⁷Aga wo piri paki‐go naviriana sikai ni navasadodom̃atakiana, Go aga wo pioso ki nagisa ni Yehovah.

¹⁸Nasaiana aginau maga paki Yehovah aga wo lagati dua e ara, Aga mari a kivea ki narei aneana mamau;

¹⁹Roara maga ni nasum̃a ki Yehovah, M̃aleoputo kakam̃a, Yerusalem O. Kuga samasamani Yah.