Read Nguna Togoa Etafe North SALAMO 119 Bible Online

SALAMO 119 - Nguna Togoa Etafe North bible

SALAMO 119

¹ALEPH. Ae namaropaana ki tea wia lua maga ni napua, Waina eu do surata pae nawotaeana ki Yehovah!

²Ae namaropaana ki tea maga waina eu do dapesoki nanoasokisokiana aneana maga, Waina eu do laaga asa ki nap̃op̃oda mamau!

³Go eu da mari te namarinaleotageleana mau; Eu do surata pae napua aneana maga.

⁴Nigo ku dip̃a ki gami navasaparatikiana anigo maga, Naga auga vavaigoro parati ki da.

⁵Ako napua aginau maga eu pe vei tea lawokilaketokoana, Naga aga vavaigoro natawonakiana anigo maga!

⁶Ragi wanogoe aga wo da maliere mau, Ragi waina aga wo do leopunusi natip̃akiana anigo maga mamau puti.

⁷Aga wo pasadodom̃ata ki‐go ki p̃op̃o leana, Ragi waina aga wo ataedogo navasap̃otaeana leana anigo maga.

⁸Aga wo pavaigoro natawonakiana anigo maga: P̃a ta doropusi p̃arua ki nau mau. BETH.

⁹Natureai ega wo mari napua aneana ega tautau dapale sava, Naga ega vavaigoro e ega vae navasaana anigo?

¹⁰A laaga ako ki nap̃op̃ogu mamau: P̃a mari au aga ta sasap̃o m̃elu dua ki natip̃akiana anigo maga mau.

¹¹A doropusi nanoaana anigo nap̃op̃ogu, Naga aga ta mari naleo sa paki‐go mau.

¹²Nigo ku pei tea vasap̃iakiana, Yehovah O: P̃a vasapisei ki nau natawonakiana anigo maga.

¹³A dogorogo ki nagolegu maga. Ki navasap̃otaeana maga mamau puti ni nawokam̃a.

¹⁴A laelaea p̃arua napua ni nanoasokisokiana anigo maga, Dapala e pe nalakena sara nasogolapaana.

¹⁵Aga wo do midodoa navasaparatikiana anigo maga, Po do leopunusi napua anigo maga.

¹⁶Aga wo maro natawonakiana anigo maga: Aga wo da malio ki navasaana anigo mau. GIMEL.

¹⁷P̃a marim̃ata ki tea suasua anigo, naga aga mauri doko; Go aga wo pavaigoro navasaana anigo.

¹⁸P̃a vukesi namatagu maga, naga aga leopunusi Tea ni namagaana maga m̃elu nawotaeana anigo.

¹⁹Kinau a pei nam̃enaki doko maramana: P̃a ta dasuru ki nau natip̃akiana anigo maga mau.

²⁰Naatagu e mawora nalakena namasauana Paki navasap̃otaeana anigo maga sara ragi.

²¹Ku pasa kasua ki tea leomadaga maga, tea vasasakiana maga, Waina eu do sasap̃o m̃elu dua ki natip̃akiana anigo maga.

²²P̃a malulu ki navasapinoakiana go namidoakip̃alokiana m̃elu dua ki nau pano; Nalakena a dapesoki nanoasokisokiana anigo maga.

²³Tea maraki maga ma eu dasake po pasa dip̃a au: Ma tea suasua anigo e do midodoa natawonakiana anigo maga.

²⁴Go nanoasokisokiana anigo maga eu pei namaroana aginau, Go naatam̃oli maga ni namidoakip̃otaeana aginau. DALETH.

²⁵Naatagu e puluti nam̃otam̃ota: P̃a vakamauri ki nau ega vae navasaana anigo.

²⁶A dogorogo ki napua aginau maga, go ku pasadara au: P̃a vasapisei ki nau natawonakiana anigo maga.

²⁷P̃a mari au aga midoakiatae napua ni navasaparatikiana anigo maga: Go aga wo do midodoa nawosiana ni namagaana anigo maga.

²⁸Naatagu e do kai nalakena nasusueana: P̃a mari au aga mauri doko ega vae navasaana anigo.

²⁹P̃a mari napua ni nasorosoroana ega m̃elu dua ki nau pano: Go p̃a saup̃ia ki dua au nawotaeana anigo.

³⁰A matadoa napua ni nalomauana: A lawo ki navasap̃otaeana anigo maga naraegu.

³¹A puluti nanoasokisokiana anigo maga: Yehovah O, p̃a ta mari au aga maliere mau.

³²Aga wo sava napua ni natip̃akiana anigo maga, Nalakena p̃a wo mari nap̃op̃ogu ega welewelea. HE.

³³P̃a rigipisei ki nau, Yehovah O, napua ni natawonakiana anigo maga; Go aga wo leo parati ki nia pa pa paki namatap̃agona edaku.

³⁴P̃a mari au aga midoakiatae, go aga wo dogo parati ki nawotaeana anigo; Go aga wo pavaigoro e ki nap̃op̃ogu mamau.

³⁵P̃a mari au aga surata napua ni natip̃akiana anigo maga; Nalakena a maro asa.

³⁶P̃a kerea ki nap̃op̃ogu paki nanoasokisokiana anigo maga, Go ega ta kere paki nataluaana mau.

³⁷P̃a vuadoa namatagu maga pa dua ki naleopunusiana ni nap̃aloana, Go p̃a vakamauri ki nau doko napua anigo maga.

³⁸P̃a magi tea suasua anigo lawosoki nanoaana anigo, Waina e pei agi namatau‐ki‐go‐ana.

³⁹P̃a mari navasapinoa‐ki‐nau‐ana, waina a matau ki nia, ega liu pano; Nalakena navasap̃otaeana anigo maga eu p̃ia.

⁴⁰P̃a leo, a masau p̃arua ki navasaparatikiana anigo maga: P̃a vakamauri ki nau doko namarinaleoleanaana anigo. VAU.

⁴¹Go nadodomiana anigo maga euga umai paki nau, Yehovah O, Namautipauriana anigo, ega vae nanoaana anigo.

⁴²Go aga wo pasadara tea vasapinoa ki nau navasaana sikai; Nalakena a pavatu navasaana anigo.

⁴³Go p̃a ta dapelua p̃arua ki navasaana ni nalomauana m̃elu dua ki nawokagu mau; Nalakena a leogoro navasap̃otaeana anigo maga.

⁴⁴Go aga wo pavaigoro nawotaeana anigo sara ragi. Pa pa ega tu du po du mau du.

⁴⁵Go aga wo surata tokora welewelea sikai; Nalakena a laaga navasaparatikiana anigo maga.

⁴⁶Go aga wo pasa nanoasokisokiana anigo maga narae ni nawota maga, Go aga wo da maliere mau.

⁴⁷Go aga wo maro natip̃akiana anigo maga, Waina a dodomi ra.

⁴⁸Go aga wo dara sike nam̃elearugu maga paki natip̃akiana anigo maga, waina a dodomi ra; Go aga wo do midodoa natawonakiana anigo maga. ZAIN.

⁴⁹P̃a magi tea suasua anigo midoa ki navasaana anigo, Nalakena ku mari au a leogoro.

⁵⁰Tea wanogoe e pei navasapakavakale‐au‐ana doko narogokitesaana aginau: Nalakena nanoaana anigo e pakamauri ki nau.

⁵¹Tea leomadaga maga eu pasasaudoa ki p̃arua ki nau: Ma a da dawasi m̃elu dua ki nawotaeana anigo mau.

⁵²A midoa ki navasap̃otaeana anigo maga waina eu doko pae tuai, Yehovah O, Go a dum̃agu pasapakavakale au.

⁵³Namaetoana vivitinu e puati au, Nalakena tea sigisigileo maga waina eu doropusi nawotaeana anigo.

⁵⁴Natawonakiana anigo maga eu pei nalegaana aginau maga. Nasum̃a ni nam̃enaki‐atatokoana aginau.

⁵⁵A midoa ki nagisam̃a p̃ogi, Yehovah O, Go a pavaigoro nawotaeana anigo.

⁵⁶Tea wanogoe e pakilina ki nau, Nalakena a dogo parati ki navasaparatikiana anigo maga. CHETH.

⁵⁷Yehovah e pei matele veaniana aginau: A noa naga aga vavaigoro navasaana anigo maga.

⁵⁸A pavarani naraem̃a ki nap̃op̃ogu mamau: P̃a saup̃ia ki nau ega vae nanoaana anigo.

⁵⁹A midoakiusiusi napua aginau maga, Po mari nam̃elegu ero liliu paki nanoasokisokiana anigo maga.

⁶⁰A mari m̃araverave, po da mari daliali mau, Naga aga vavaigoro natip̃akiana anigo maga.

⁶¹Natali maga ki tea sigisigileo maga eu daligoro au; Ma a da malio ki nawotaeana anigo mau.

⁶²P̃ogi matua aga wo duleana asa naga aga vasadodom̃ata ki‐go Nalakena navasap̃otaeana leana anigo maga.

⁶³Kinau a pei ta ni tea maga mamau puti waina eu matau ki‐go, Go ni tea maga waina eu pavaigoro navasaparatikiana anigo maga.

⁶⁴Yehovah O, maramana e pura ki nadodomiana anigo: P̃a vasapisei ki nau natawonakiana anigo maga. TETH.

⁶⁵Ku marim̃ata ki tea suasua anigo, Yehovah O, pae navasaana anigo.

⁶⁶P̃a vasapisei ki nau namidoakip̃otaeana wia go naataeana; Nalakena a saralomau natip̃akiana anigo maga.

⁶⁷Ragi waina a ko da sua narogokitesaana mau kinau a do sasap̃o pano; Ma ragi waia a do pavaigoro nanoaana anigo.

⁶⁸Nigo ku p̃ia, go ku do mari p̃ia; P̃a vasapisei ki nau natawonakiana anigo maga.

⁶⁹Tea leomadaga maga eu turi nasorosoroana sikai dip̃a au: Kinau aga wo dogo parati ki navasaparatikiana anigo maga ki nap̃op̃ogu mamau.

⁷⁰Nap̃op̃oda e m̃anopunopu dapala nam̃aladua; Kinau a maro nawotaeana anigo.

⁷¹E p̃ia ki nau naga a pei tea mariana a dogokitesa; Naga aga ataedogo natawonakiana anigo maga.

⁷²Nawotaeana ni nawokam̃a e p̃ia ki nau liu manu maga ni kold go silver. YOD.

⁷³Nam̃elearum̃a ero mari au po maridawona ki nau: P̃a mari au aga midoakiatae, naga aga ataedogo natip̃akiana anigo maga.

⁷⁴Tea maga waina eu matau ki‐go euga wo punusi au po laelaea; Nalakena a leogoro navasaana anigo.

⁷⁵A atae, Yehovah O, naga navasap̃otaeana anigo maga eu leana, Go naga ku mari au pae naveilomauana a dogokitesa.

⁷⁶Nadodomiana anigo a pavarani ko asa, ega vei agi navasapakavakale‐au‐ana, Ega vae nanoaana anigo paki tea suasua anigo.

⁷⁷Namaritadodomiana anigo maga euga umai paki nau, naga aga mauri doko: Nalakena nawotaeana anigo e pei namaroana aginau.

⁷⁸Tea leomadaga maga euga maliere; nalakena eu mari dagele ki nau ki nasorosoroana: Kinau aga wo do midodoa navasaparatikiana anigo maga.

⁷⁹Tea maga waina eu matau ki‐go euga liliu umai punusi au, Go euga wo atae nanoasokisokiana anigo maga.

⁸⁰Nap̃op̃ogu ega wia lua doko natawonakiana anigo maga; Naga aga ta maliere mau. CAPH.

⁸¹Naatagu e sirinopu raki namautipauriana anigo: A do leogoro navasaana anigo.

⁸²Namatagu ero sirinopu raki nanoaana anigo, Ragi waina a do naga, P̃a wo pasapakavakale au seve ragi?

⁸³Nalakena a po dapala noai ni nawili sikai doko naasua; Ma a da malio ki natawonakiana anigo maga mau.

⁸⁴Naaleatia maga ki tea suasua anigo eu pisa? P̃a wo mari navasap̃otaeana paki tea maga waina eu kopalele au seve ragi?

⁸⁵Tea leomadaga maga eu kili m̃orutano maga raki nau, Waina eu da pae nawotaeana anigo mau.

⁸⁶Natip̃akiana anigo maga mamau puti eu pei nalomauana: Eu kopalele au ki nasorosoroana; p̃a silae au.

⁸⁷Eu mari au a m̃aladigi sirinopu maramana; Ma kinau a da doropusi navasaparatikiana anigo maga mau.

⁸⁸P̃a vakamauri ki nau ega vae nadodomiana anigo; Go aga wo pavaigoro nanoasokisokiana ni nawokam̃a. LAMED.

⁸⁹Navasaana anigo, Yehovah O, E pei tea lawokiana nakoroatelagi pa pa e du mau du.

⁹⁰Naveilomauana anigo e paki tagona go tagona: Ku lawokilaketoko maramana, go e do lawodu.

⁹¹Eu magi navasap̃otaeana anigo maga lawodu naaleatia waia; Nalakena tea mamau puti eu pei tea suasua anigo maga.

⁹²Nawotaeana anigo e pe ta pei namaroana aginau mau, A pe vuoli ragi wanogoe narogokitesaana aginau.

⁹³Aga wo da malio ki navasaparatikiana anigo maga mau pa pa ega tu mau du; Nalakena ku pakamauri ki nau ara.

⁹⁴Kinau a pei anigo, p̃a mautipauri au; Nalakena a laaga navasaparatikiana anigo maga.

⁹⁵Tea sigisigileo maga eu leogoro au naga euga maripuoli ki nau; Ma aga wo midoakiatae nanoasokisokiana anigo maga.

⁹⁶A punusi namatap̃ago sikai ni sara nawialuaana; Ma natip̃akiana anigo e p̃elewelea p̃arua liu. MEM.

⁹⁷A dodomi nawotaeana anigo pa! Nae e pei namidodoana aginau naaleatia mamau.

⁹⁸Natip̃akiana anigo maga eu do mari au a manumatua liu tea kokona ki nau maga; Nalakena nara eu pei aginau pa pa e du mau du.

⁹⁹A do mari manumatua liu tea maga mamau puti waina eu do pasapisei ki nau; Nalakena nanoasokisokiana anigo maga eu pei namidodoana aginau.

¹⁰⁰A do midoakiatae p̃arua liu tea matua maga, Nalakena a dogo parati ki navasaparatikiana anigo maga.

¹⁰¹A mauti nam̃elegu maga pa dua ki sara napua sa. Naga aga vavaigoro navasaana anigo.

¹⁰²A da dawasi m̃elu dua ki navasap̃otaeana anigo maga mau; Nalakena nigo ku do digipisei ki nau.

¹⁰³Nanoaana anigo maga eu gagadi paki namagagu pa! Eu gagadi paki nawokagu p̃arua liu honi!

¹⁰⁴A do midoakiatae pae navasaparatikiana anigo maga: Nalakena tea wanogoe a do pilosi sara napua ni nasorosoroana. NUN.

¹⁰⁵Navasaana anigo e pei nasulu sikai agi nam̃elegu maga, Go namarama sikai agi napua aginau.

¹⁰⁶A pivisa, go a lawosoki a, Naga aga wo pavaigoro navasap̃otaeana leana anigo maga.

¹⁰⁷A pei tea mariana a dogokitesa p̃arua liu: Yehovah O, p̃a vakamauri ki nau ega vae navasaana anigo.

¹⁰⁸P̃a tape navituaana suasuakiana maga ni nawokagu, a pavarani ko asa, Yehovah O, Go p̃a vasapisei ki nau navasap̃otaeana anigo maga.

¹⁰⁹Naatagu e doko nam̃elearugu sara ragi; Ma a da malio ki nawotaeana anigo mau.

¹¹⁰Tea sigisigileo maga eu lawo ki vaivai sikai raki nau; Ma a da sasap̃o m̃elu dua ki navasaparatikiana anigo maga mau.

¹¹¹A dape nanoasokisokiana anigo maga eu pei tea veaniana aginau pa pa e du mau du. Nalakena nara eu pei nalaelaeaana ni nap̃op̃ogu.

¹¹²A kerea ki nap̃op̃ogu naga aga mari natawonakiana anigo maga, Pa pa ega tu mau du, pa pa paki namatap̃ago edaku. SAMECH.

¹¹³A pilosi tea p̃op̃o ruarua maga; Ma a dodomi nawotaeana anigo.

¹¹⁴Nigo ku pei tokora ni natokolokuana aginau go nakokoro aginau: A do leogoro navasaana anigo.

¹¹⁵Kuga m̃elu dua ki nau pano, tea mari naleo sa maga; Go aga wo dogo parati ki natip̃akiana maga ki Sup̃e aginau.

¹¹⁶P̃a silae au ega vae nanoaana anigo, naga aga mauri doko; Go naga aga ta maliere ki naleogoroana aginau mau.

¹¹⁷P̃a silae au, go aga wo pei tea mautipauriana, Go aga wo leopunusi natawonakiana anigo maga sara ragi.

¹¹⁸Ku midoakip̃alo ki tea maga mamau puti waina eu do sasap̃o m̃elu dua ki natawonakiana anigo maga; Nalakena namarisoreana adeada e pei nasorosoroana.

¹¹⁹Ku maripuoli ki tea sigisigileo maga mamau puti ni maramana dapala nasam̃a: Nalakena tea wanogoe a dodomi nanoasokisokiana anigo maga.

¹²⁰Nap̃okasigu e do durururu nalakena namatau‐ki‐go‐ana; Go a matau ki navasap̃otaeana anigo maga. AIN.

¹²¹A mari navasap̃otaeana go namarinaleoleanaana: P̃a ta magi tea maga waina eu do maripavakoto paki nau doropusi au mau.

¹²²P̃a magi tea suasua anigo pei tea tu oli a raki tea wia: Tea leomadaga maga euga ta maripavakoto paki nau mau.

¹²³Namatagu ero sirinopu raki namautipauriana anigo, Go raki nanoaana leana anigo.

¹²⁴P̃a mari paki tea suasua anigo ega vae nadodomiana anigo, Go p̃a vasapisei ki nau natawonakiana anigo maga.

¹²⁵Kinau e pei tea suasua anigo, p̃a mari au aga midoakiatae; Go aga wo atae nanoasokisokiana anigo maga.

¹²⁶E po pei ragi waina Yehovah ega marimari; Eu dapiri nawotaeana anigo.

¹²⁷Nalakena tea wanogoe a dodomi natip̃akiana anigo maga P̃arua liu kold, go p̃arua liu kold wia.

¹²⁸Nalakena tea wanogoe a midoa ki nia naga navasaparatikiana maga mamau puti ni naleo maga mamau puti eu leana; Go a pilosi sara napua ni nasorosoroana. PE.

¹²⁹Nanoasokisokiana anigo maga eu pei tea ni namagaana: Nalakena tea wanogoe naatagu e do dogo parati ki da.

¹³⁰Nawolagatiana ni navasaana anigo maga e do maramalagati; E do mari tea manumatavusa maga eu midoakiatae.

¹³¹A maga ki nawokagu, po gaegae; Nalakena a masau p̃arua ki natip̃akiana anigo maga.

¹³²P̃a tum̃am̃a doa ko paki nau, go p̃a saup̃ia ki nau, Ega tapala waina ku do mari a paki tea maga waina eu dodomi nagisam̃a.

¹³³P̃a lawokilaketoko navasiana aginau maga doko nanoaana anigo; Go te namarinaleotageleana sikai ega ta maramara dap̃au au mau.

¹³⁴P̃a taulua au m̃elu dua ki namaripavakotoana ki naatam̃oli: Go aga wo pavaigoro navasaparatikiana anigo maga.

¹³⁵P̃a mari naraem̃a ega maramalaga paki tea suasua anigo; Go p̃a vasapisei ki nau natawonakiana anigo maga.

¹³⁶Namatagu ero sara siwo ki noaisara maga, Nalakena eu da pavaigoro nawotaeana anigo mau. TZADE.

¹³⁷Nigo ku leana, Yehovah O, Go navasap̃otaeana anigo maga eu leana.

¹³⁸Ku dip̃a ki nanoasokisokiana anigo maga doko namarinaleoleanaana. Go naveilomauana warua liu.

¹³⁹Nasuisuiana aginau e mari au a punuta, Nalakena tea kokona ki nau maga eu malio ki navasaana anigo maga.

¹⁴⁰Nanoaana anigo e dautau p̃arua liu; Go tea suasua anigo e dodomi a.

¹⁴¹Kinau a pei tea kiki go tea midoakip̃alokiana: Ma a da malio ki navasaparatikiana anigo maga mau.

¹⁴²Namarinaleoleanaana anigo e pei naleanaana waina e du mau du, Go nawotaeana anigo e pei nalomauana.

¹⁴³Nariesokiana go narogokitesaana ero pap̃ai au: Ma natip̃akiana anigo maga eu pei namaroana aginau.

¹⁴⁴Nanoasokisokiana anigo maga eu leana pa pa e du mau du: P̃a mari au aga midoakiatae, go aga wo mauri. KOPH.

¹⁴⁵A pioso ki nap̃op̃ogu mamau; p̃a vasadara au, Yehovah O: Aga wo dogo parati ki natawonakiana anigo maga.

¹⁴⁶A pioso paki‐go; p̃a mautipauri au, Go aga wo pavaigoro nanoasokisokiana anigo maga.

¹⁴⁷A duleana ragi ni namakotokotoana, po kuapioso: A leogoro navasaana anigo maga.

¹⁴⁸Namatagu ero pea ki navavaigoroana maga ni p̃ogi, Naga aga midodoa nanoaana anigo.

¹⁴⁹P̃a rogo nadaleogu ega vae nadodomiana anigo: P̃a vakamauri ki nau, Yehovah O, ega vae navasap̃otaeana anigo maga.

¹⁵⁰Tea maga waina eu dausi nawosiana sa eu pei m̃aladigi; Eu madu uvea ki nawotaeana anigo.

¹⁵¹Nigo ku pei m̃aladigi, Yehovah O; Go natip̃akiana anigo maga mamau puti eu pei nalomauana.

¹⁵²Tuai a atae pae nanoasokisokiana anigo maga. Naga ku lawo ki da pa pa e du mau du. RESH.

¹⁵³P̃a vunusi narogokitesaana aginau go p̃a vualua au; Nalakena a da malio ki nawotaeana anigo mau.

¹⁵⁴P̃a vululu navululuana aginau, go p̃a taulua au: P̃a vakamauri ki nau ega vae nanoaana anigo.

¹⁵⁵Namautipauriana e madu uvea ki tea sigisigileo maga; Nalakena eu da laaga natawonakiana anigo maga mau.

¹⁵⁶Namaritadodomiana anigo maga eu laapa, Yehovah O: P̃a vakamauri ki nau ega vae navasap̃otaeana anigo maga.

¹⁵⁷Tea kopalele au go tea riesoki au eu laapa; Ma a da dawasi m̃elu dua ki nanoasokisokiana anigo maga mau.

¹⁵⁸A punusi tea marimalauweluki maga, go a mamarago; Waina eu da pavaigoro nanoaana anigo mau.

¹⁵⁹P̃a vunusi naga a dodomi navasaparatikiana anigo maga: P̃a vakamauri ki nau, Yehovah O, ega vae nadodomiana anigo.

¹⁶⁰Nasaisaikiana ni navasaana anigo e pei nalomauana; Go sara navasap̃otaeana leana anigo maga eu du mau du. SHIN.

¹⁶¹Tea maraki maga eu kopalele m̃oli ki nau; Go nap̃op̃ogu e mataku nalakena navasaana anigo maga.

¹⁶²Kinau a do laelaea p̃arua nalakena nanoaana anigo, Dapala tea waina e pap̃ai tea vutiluapavakotoana warua.

¹⁶³A pilosi nasorosoroana po mamarago ki nia; A dodomi nawotaeana anigo.

¹⁶⁴A do paka larua samasamani ko naaleatia sikai, Nalakena navasap̃otaeana leana anigo maga.

¹⁶⁵Natam̃ateana warua e pei agi tea maga waina eu dodomi nawotaeana anigo; Go tea tapilagonaana adeada e da doko mau.

¹⁶⁶A leogoro namautipauriana anigo, Yehovah O, Go a mari natip̃akiana anigo maga.

¹⁶⁷Naatagu e pavaigoro nanoasokisokiana anigo maga; Go a dodomi p̃arua ki‐da.

¹⁶⁸A pavaigoro navasaparatikiana anigo maga go nanoasokisokiana anigo maga; Nalakena napua aginau maga mamau puti eu doko kivea ki‐go. TAU.

¹⁶⁹Nakuapiosoana aginau ega valoti paki m̃aladigi ki naraem̃a, Yehovah O: P̃a mari au aga midoakiatae ega vae navasaana anigo.

¹⁷⁰Navavaraniana aginau ega valoti paki naraem̃a: P̃a vualua au ega vae nanoaana anigo.

¹⁷¹Nagolegu eroga wo lua ki nasamasamaniana; Nalakena p̃a wo pasapisei ki nau natawonakiana anigo maga.

¹⁷²Namenagu ega lega nanoaana anigo; Nalakena natip̃akiana anigo maga mamau puti eu pei namarinaleoleanaana.

¹⁷³Nam̃elearum̃a ega to silae au; Nalakena a matadoa navasaparatikiana anigo maga.

¹⁷⁴A masau p̃arua ki namautipauriana anigo, Yehovah O, Go nawotaeana anigo e pei namaroana aginau.

¹⁷⁵Naatagu ega mauri, go ega wo samasamani ko; Go navasap̃otaeana anigo maga euga silae au.

¹⁷⁶A sasap̃o pano dapala shiip sikai waina e puoli; p̃a laaga tea suasua anigo; Nalakena a da malio ki natip̃akiana anigo maga mau.