Read Nguna Togoa Etafe North SALAMO 121 Bible Online

SALAMO 121 - Nguna Togoa Etafe North bible

SALAMO 121

¹Nalegaana sikai agi nasakeana maga. Aga wo sike namatagu maga paki tava maga: Nasilae‐au‐ana ega wo pae esava umai?

²Nasilae‐au‐ana e pae Yehovah umai, Waina e mari nakoroatelagi go maramana.

³Ega ta pitua ki nam̃elem̃a naga ega va‐parasai mau: Tea waina e do pavaigoro ko ega ta matamaturu mau.

⁴P̃a leo, tea waina e do pavaigoro Israel Ega wo da matamaturu mau go ega wo da maturu daratara mau.

⁵Yehovah e pei tea waina e do pavaigoro ko: Yehovah e pei melu anigo pisari nam̃elearum̃a ni matua.

⁶Elo ega wo da atugi ko aleati mau, Go atelagi p̃ogi mau.

⁷Yehovah ega wo pavaigoro ko pa dua ki sara nasaana; Ega wo pavaigoro naatam̃a.

⁸Yehovah ega wo pavaigoro natave pano‐ana anigo go naumaipaki‐ekopu‐ana anigo, Pae ragi waia pa pa go ega tu mau du.