Read Nguna Togoa Etafe North SALAMO 132 Bible Online

SALAMO 132 - Nguna Togoa Etafe North bible

SALAMO 132

¹Nalegaana sikai ni nasakeana maga. Yehovah O, p̃a magi David midoa ki Narogokitesaana aneana mamau;

²Waina e pivisa paki Yehovah, Po sai paki Tea Kasua ki Yakob:

³Aga wo da paki ekopu ni tap̃aup̃au ni nasum̃a aginau mau, Aga wo da sake paki nawewele p̃elesakiana aginau mau;

⁴Aga wo da pitua ki namaturuana paki namatagu maga mau, Kite namatamaturuana paki nawili ni namatagu maga mau;

⁵Pa pa aga wo pap̃ai tokora sikai agi Yehovah, Natokoana sikai agi Tea Kasua ki Yakob.

⁶Kuga leo, au dogo e Efrathah: Au pap̃ai a vanua maga ni mala ni nakau.

⁷Tuga wo paki natokoana aneana; Tuga wo suai natano paki malo vasiana ni nam̃elena maga.

⁸P̃a tuleana, Yehovah O, paki tokora ni namaromaroana anigo; Nimu ma areka ni nakasuaana anigo.

⁹Tea viri anigo maga euga vei tea sugoroana ki namarinaleoleanaana; Go tea dodomi‐dodomiana anigo maga euga kola‐laelaea.

¹⁰Nalakena David tea suasua anigo P̃a ta mari narae ni tea vuvuraikiana anigo ega liliu pano mau.

¹¹Yehovah e pivisa paki David nalomauana; Ega wo da liliu m̃elu dua ki nia mau: Tea ni nawa ni nap̃elem̃a aga wo lawo ki nia malo tasake anigo.

¹²Natum̃a maga eu pe wo pavaigoro navasasokiana aginau, Go nanoasokisokiana aginau maga waina aga wo pasapisei ki da ara, Natuda ma eu pe wo dasake malo tasake anigo pa pa e pe tu mau du.

¹³Nalakena Yehovah e matadoa Sion; E masauna naga ega vei natokoana aneana.

¹⁴Tea waia e pei tokora ni namaromaroana aginau pa pa e du mau du: Aga wo doko tokora waia doko; nalakena a masauna.

¹⁵Aga wo pasap̃ia ki p̃arua ki tea kaniana aneana: Aga wo mari tea tika kakana maga euga vuka ki navinaga.

¹⁶Go aga wo sugoro tea viri kakana maga ki namautipauriana: Go tea dodomi‐dodomiana kakana maga euga wo kolalaelaea p̃arua.

¹⁷Tokora wanogoe aga wo mari napati ni nap̃au ni David ega siria asa: A magi tea vuvuraikiana aginau marim̃ata ki nasulu sikai.

¹⁸Tea kokona ki nia maga aga wo sugoro ra ki namaliereana: Ma vauvau aneana ega wo pum̃a doko asa.