Read Nguna Togoa Etafe North SALAMO 135 Bible Online

SALAMO 135 - Nguna Togoa Etafe North bible

SALAMO 135

¹Kuga samasamani Yah. Kuga samasamani nagisa ni Yehovah; Kuga samasamani a, tea suasua maga ki Yehovah:

²Waina ku do lawodu ekopu ni nasum̃a ki Yehovah, Roara maga ni nasum̃a ki Sup̃e anigida.

³Kuga samasamani Yah; nalakena Yehovah e p̃ia: Kuga lega‐samasamani nagisana; nalakena e pei tea masauniana.

⁴Nalakena Yah e matadoa Yakob naga ega vei aneana, Go Israel naga ega vei aneana nalo wia liu.

⁵Nalakena kinau a atae naga Yehovah e p̃arua, Go naga Nawota anigida e liu sup̃e maga mamau puti.

⁶Sara naleo waina Yehovah e masauna naga ega mari ra, e do mari ra, Nakoroatelagi go maramana, natasi maga go epua maga mamau puti.

⁷E do mari namavu maga eu sake pae namatap̃ago ni maramana; E do magi usa mari navila maga; E do piragi nalagi e dave m̃elu dua ki nasum̃a aneana maga ni nalo tauakiana maga.

⁸Waina e atu tea takalapa maga ni Ityipt, Naatam̃oli go nalo tuavati.

⁹E dip̃akilua navaivaiana maga go tea ni namagaana maga paki m̃aleoputo kakam̃a, Ityipt O. Paki Faraoh, go paki tea suasua aneana maga mamau puti.

¹⁰Waina e atu nalauna laapa, Po maripunue nawota marimatua maga;

¹¹Sihon nawota ki naworawora ni Amor, Go Ok nawota ni Bashan, Go nalauna maga mamau puti ni Kanaan:

¹²Po pitua ki navanua adeada e pei tea veanipiolikiana sikai, Tea veanipiolikiana sikai agi Israel narei aneana.

¹³Yehovah O, nagisam̃a e du mau du; Yehovah O, namidoa‐ki‐go‐ana e paki tagona go tagona.

¹⁴Nalakena Yehovah ega wo pasap̃otae narei aneana, Go ega wo midoakipiri nalo ni tea suasua aneana maga.

¹⁵Nasup̃e maga ki nalauna maga eu pei silver go kold, Nawosiana ni nam̃elearu maga ni naatam̃oli maga.

¹⁶Eu pilake nawokada, ma eu da pasa mau; Eu pilake namatada maga, ma eu da leosai mau;

¹⁷Eu pilake nadaligada maga, ma eu da dogo mau; Go te nameroda e da doko nawokada mau.

¹⁸Tea maga waina eu mari ra euga wo dakiusi ra; Sara naata waina eu do pavatu ara.

¹⁹Nasum̃a ni Israel O, kuga vasap̃ia ki Yehovah: Nasum̃a ni Aaron O, kuga vasap̃ia ki Yehovah:

²⁰Nasum̃a ni Levi O, kuga vasap̃ia ki Yehovah: Tea maga waina ku matau ki Yehovah, kuga vasap̃ia ki Yehovah.

²¹Yehovah ega vei tea vasap̃iakiana m̃elu Sion, Waina e doko Yerusalem. Kuga samasamani Yah.