Read Nguna Togoa Etafe North SALAMO 139 Bible Online

SALAMO 139 - Nguna Togoa Etafe North bible

SALAMO 139

¹Salamo sikai ki David. Yehovah O, ku leousiusi au, go ku atae au.

²Nigo ku atae nato‐natano‐ana aginau go natuleanaana aginau, Ku midoakiatae namidodoana aginau pae uvea.

³Ku puausiusi nasurataana aginau go naone‐natano‐ana aginau, Go ku atae m̃ata ki napua aginau maga mamau puti.

⁴Nalakena navasaana sikai e da doko namenagu mau, Waina, p̃a leo, Yehovah O, ku da atae puti a mau.

⁵Ku kelugoro au kiedaku go kivea, Go ku doropusi nam̃elearum̃a au.

⁶Naataeana ni namagaana dapala nogoe e p̃arua ki nau; E pakilagi, a marisap̃o pa parati ki nia.

⁷Aga surata paki esava pa dua ki naatam̃a? Go aga sava paki esava m̃elu dua ki naraem̃a?

⁸A pe sake paki nakoroatelagi, nigo ku doko tokora wanogoe: Go a pe mari nawewele aginau Sheol, p̃a leo, ku doko tokora wanogoe.

⁹Aga wo sike nalivaru maga ni malip̃ogi, Aga wo doko namatap̃ago ni uvea ni natasi;

¹⁰Tokora wanogoe ma nam̃elearum̃a ega wo maraki au asa, Go nam̃elearum̃a ni matua ega wo puasoki au asa.

¹¹Go a naga, Lomau namaligo ega wo dap̃augoro au, Go p̃ogi e po pei namarama dalivirigoro au;

¹²Namaligo e da mari a e maligo paki‐go mau, Go p̃ogi e maramalaga dapala aleati: Namaligo go namarama ero pataka sikai.

¹³Nalakena nigo ku peani nap̃elekevatugu maga: Ku kovagoro au nap̃ele ni p̃ilagu.

¹⁴Aga wo pasa dodom̃ata ki‐go, nalakena a pei tea wotaeluaana ki tea mataukiana maga: Nawosiana anigo maga eu pei tea ni namagaana; Go naatagu e atae m̃ata ki nia.

¹⁵Roputau kakagu e da pei tea surukiana kiam̃a mau, Ragi waina a pei tea mariana tokora sili, Po pei tea vau‐midiriaana epua maga ni natano.

¹⁶Namatam̃a ero punusi au ragi waina a pei m̃olim̃oli doko, Go eu mamau puti pei tea midiriana tusi anigo, Naaleatia maga waina eu pei tea tawonakiana, Ragi waina sikai kakada e ko da doko mau.

¹⁷Go namidodoana anigo maga eu pei tea wia pa paki‐nau, Sup̃e O! Nasaisaikiana kakada e p̃arua pa!

¹⁸A pe veve ra, eu pe laapa liu naworaone: A darapa, go a sikoti ko doko.

¹⁹Ku pe wo maripunue tea sigisigileo, Sup̃e O: Go kuga m̃elu dua ki nau pano, naatam̃oli maga ni nada.

²⁰Waina eu noa ko pae nasigisigileoana, Po noa m̃oli ki nagisam̃a, tea kokona ki‐go maga.

²¹Aga ta pilosi tea maga waina eu pilosi ko, Yehovah O, kite? Go aga ta mamarago ki tea maga waina eu duleana dip̃a ko kite?

²²A pilosi ra ki navilosiana matua: A midoa ki da naga eu pei tea kokona ki nau.

²³P̃a leousiusi au, Sup̃e O, po atae nap̃op̃ogu: P̃a maridogo au, po atae namidodoana aginau maga:

²⁴Go p̃a leopunusi, te napua ni navitinuana e pe toko au, Go p̃a maraki au pae napua waina e du mau du.