Read Nguna Togoa Etafe North SALAMO 140 Bible Online

SALAMO 140 - Nguna Togoa Etafe North bible

SALAMO 140

¹Salamo sikai ki David. Yehovah O, p̃a vualua au pa dua ki naatam̃oli sa; P̃a wo mauti au ki naatam̃oli ni namaripavakotoana:

²Waina eu midoa ki tea sa maga nap̃op̃oda; Sara naaleatia eu saisai naga euga mari navakalo.

³Eu pakali namenada dakiusi m̃aata sikai; Noai ni namateana ni adder e doko etano ni nagoleda maga. Selah.

⁴P̃a vavaigoro au, Yehovah O, pa dua ki nam̃elearu maga ni tea sigisigileo; P̃a wo mauti au ki naatam̃oli ni namaripavakotoana maga: Waina eu midoa ki nia naga euga tosiva ki navasiana aginau maga.

⁵Tea leomadaga maga eu dasuru ki nasasa sikai raki nau, go namea maga; Eu p̃elesa ki kup̃ena sikai nadigi ni napua; Eu lawo ki vaivai maga raki nau. Selah.

⁶A noa ki Yehovah, a naga, Nigo ku pei Sup̃e aginau: Yehovah O, p̃a takidorogo nadaleo ni navavaraniana aginau maga.

⁷Yehovah, Nawota O, nakasuaana ni namautipauri‐au‐ana, Ku kovagoro nap̃augu naaleatia ni navakalo.

⁸Yehovah O, p̃a ta pitua ki namasauana maga ki tea sigisigileo mau, P̃a ta mari tea midoakiana sa aneana ega risu p̃ia mau; eu pe vakilagi asa. Selah.

⁹Nalo ni nap̃au ni tea maga waina eu dalivirigoro au, Narogokitesaana ni nagoleda maga ega wo dap̃augoro ra.

¹⁰Nam̃elevara vavaga maga euga wo pei tea nadikiana paki da: Ega wo mari ra euga rowo paki nakapu; Paki m̃orutano vakipua maga, naga euga ta moro duleana mau.

¹¹Naatam̃oli ni namena ega wo da pei tea lawokilaketokoana maramana mau: Naatam̃oli ni namaripavakotoana tea sa ega wo palako ki nia paki namarisakiana.

¹²A atae naga Yehovah ega wo mari navululuana ki tea rogo kite sa, Go navasap̃otaeana ki tea tika maga.

¹³Tea leana maga euga wo sikida pasadodom̃ata ki nagisam̃a: Tea leana maga euga wo doko naraem̃a.