Read Nguna Togoa Etafe North SALAMO 143 Bible Online

SALAMO 143 - Nguna Togoa Etafe North bible

SALAMO 143

¹Salamo sikai ki David. Yehovah O, p̃a rogo natapasavasaana aginau; p̃a takidorogo navavaraniana aginau maga: P̃a vasadara au doko naveilomauana anigo, go namarinaleoleanaana anigo.

²Go p̃a ta sili paki navasap̃otaeana dip̃a tea suasua anigo mau; Nalakena te naata mauri sikai ega wo da leana naraem̃a mau.

³Nalakena tea kokona e kopalele naatagu; E p̃oka‐p̃oraworae namauriana aginau paki natano: E mari au a doko tokora maligo maga, dapala tea mate tuai maga.

⁴Go naatagu e matekimala doko au; Nap̃op̃ogu nap̃alaugu e pei masomaladi.

⁵A do midoa ki naaleatia tuai maga; A do dam̃aniginigi namariana mamau puti anigo: A do midodoa nawosiana ni nam̃elearum̃a maga.

⁶A do darasike nam̃elearugu maga paki‐go: Naatagu e madou paki‐go, dapala navanua madou sikai. Selah.

⁷P̃a mari m̃araverave, p̃a vasadara au, Yehovah O; naatagu e sirinopu: P̃a ta dasuru ki naraem̃a paki nau mau; Kite a pe tapala tea maga waina eu do siwo paki m̃orutano.

⁸P̃a mari au aga rogo nadodomiana anigo malip̃ogi; Nalakena a pavatu ako: P̃a mari au aga atae napua waina aga surata asa; Nalakena a sike naatagu paki‐go.

⁹P̃a vualua au m̃elu dua ki tea kokona ki nau maga, Yehovah O: A sava sili ako naga p̃a tasuru ki nau.

¹⁰P̃a vasapisei ki nau naga aga mari namasauana anigo; nalakena nigo ku pei Sup̃e aginau: Naatam̃a e p̃ia; ega maraki au pae navanua ni naleanaana.

¹¹Nalakena nagisam̃a, Yehovah O, p̃a wo pakamauri ki nau: Doko namarinaleoleanaana anigo p̃a wo piragilua naatagu m̃elu dua ki nariesokiana.

¹²Go doko nadodomiana anigo p̃a wo mari tea kokona ki nau maga euga vunuta, Go p̃a wo maripuoli ki tea maga mamau puti waina eu do diesoki naatagu; Nalakena kinau a pei tea suasua anigo.