Read Nguna Togoa Etafe North SALAMO 145 Bible Online

SALAMO 145 - Nguna Togoa Etafe North bible

SALAMO 145

¹Salamo sikai ni nasamasamaniana ki David. Aga wo samasamani pakilagi ki‐go, Sup̃e aginau, Nawota O; Go aga wo pasap̃ia ki nagisam̃a pa pa ega tu du po du mau du.

²Aga wo pasap̃ia ki‐go sara naaleatia; Go aga wo samasamani nagisam̃a pa pa ega tu du po du mau du.

³Yehovah e p̃arua, go e pei tea waina ega vei tea samasamaniana warua liu; Go nawaruaana aneana e mari sap̃o pei tea leousiusiana.

⁴Tagona sikai euga wo pasasamasamani nawosiana anigo maga pa pa paki tagona p̃ota sikai, Go euga wo dogorogo ki namarimatuaana anigo maga.

⁵Aga wo midodoa natatap̃auana ni nasamasamaana ni nadodomadaganiana anigo, Go nawosiana ni namagaana anigo maga.

⁶Go euga wo noa nakasuaana ni namariana mataukiana anigo maga; Go aga wo dogorogo ki nawaruaana anigo.

⁷Euga wo dogorogo ki namidoakiana ni nawiaana warua anigo, Go euga wo kola‐laelaea namarinaleoleanaana anigo.

⁸Yehovah e saup̃ia, go e pei maritadododomi; E maridaliali namaetoana, go e p̃arua nadodomiana.

⁹Yehovah e p̃ia paki tea maga mamau puti; Go namaritadodomiana aneana e doko usuraki nawosiana aneana maga mamau puti.

¹⁰Yehovah O, nawosiana anigo maga mamau puti euga wo pasadodom̃ata ki‐go; Go tea dodomi‐dodomiana anigo maga euga wo pasap̃ia ki‐go.

¹¹Euga wo noa nasamasamaana ni namarakiana anigo, Go euga wo pasa nakasuaana anigo;

¹²Naga euga mari naatam̃oli natuda maga euga atae namarimatuaana aneana maga, Go nasamasamaana ni natatap̃auana ni namarakiana aneana.

¹³Namarakiana anigo e pei namarakiana sikai waina e du du po du mau du, Go namaramaraana anigo e doko sara tagona.

¹⁴Yehovah e pei tea silae agi tea maga mamau puti waina eu dowo, Go tea sike agi tea maga mamau puti waina eu kolokolo.

¹⁵Namata maga ni tea maga mamau puti eu do leogoro ako; Go nigo ku do dua ra navinaga adeada ragi kakana.

¹⁶Ku do pukesi nam̃elearum̃a, Po do mari namasauana ki sara naleo mauri e maro.

¹⁷Yehovah e leana doko napua aneana maga mamau puti, Go e dodomi doko nawosiana aneana maga mamau puti.

¹⁸Yehovah e pei m̃aladigi ki tea maga mamau puti waina eu pioso paki nia, Ki tea maga mamau puti waina eu pioso paki nia pae nalomauana.

¹⁹Ega wo mari namasauana ki tea maga waina eu matau ki nia; Go ega wo dogo nakuapiosoana adeada, go ega wo mautipauri ra.

²⁰Yehovah e do pavaigoro tea maga mamau puti waina eu do dodomi a; Ma ega wo mari sa ki tea sigisigileo maga mamau puti.

²¹Nawokagu ega wo pasa nasamasamani‐Yehovah‐ana; Go sara nap̃okasi euga wo pasap̃ia ki nagisana tapu pa pa ega tu du po du mau du.