Read Nguna Togoa Etafe North SALAMO 17 Bible Online

SALAMO 17 - Nguna Togoa Etafe North bible

SALAMO 17

¹Natapasavasaana sikai ki David. Yehovah O, p̃a rogo tea leana, p̃a takidorogo nakuapiosoana aginau; P̃a ta ki nadaligam̃a paki natapasavasaana aginau, waina e da m̃elu nagole sorosoro maga mau.

²Navasap̃otae‐au‐ana ega wo dave pae naraem̃a umai; Namatam̃a eroga wo leopunusi naleanaana maga.

³Ku maridogo nap̃op̃ogu; ku umai punusi au p̃ogi; Ku mari au a sara, p̃a wo da pap̃ai mau; Nawokagu ega wo da liu namidodoana aginau maga mau.

⁴Nalo ni nawosiana maga ki naatam̃oli, pae navasaana ni nagolem̃a maga. Kinau a pavaigoro napua maga ki tea marip̃aragoto.

⁵Navasiana aginau maga eu pa sokisoki napua anigo maga, Nam̃elegu ero da pa parasai mau.

⁶Kinau a pioso paki‐go, nalakena p̃a wo pasadara au, Sup̃e O: P̃a ta ki nadaligam̃a paki nau, p̃a rogo nanoaana aginau.

⁷P̃a visei ki nadodomiana ni namagaana anigo maga, nigo waina ku do mautipauri tea maga waina eu do pavatu ako M̃elu dua ki tea maga waina eu do duleana dip̃a ra, ki nam̃elearum̃a ni matua.

⁸P̃a vavaigoro au ega tapala atolumata, P̃a wo dasuru ki nau melu ni nalivarum̃a maga,

⁹M̃elu dua ki narae ni tea sigisigileo maga waina eu mari sa ki nau, Tea kokona ki naatagu, waina euga wo dalivirigoro au.

¹⁰Eu p̃ogoro nap̃op̃oda: Eu pasamadaga ki nawokada.

¹¹Ragi waia eu dalivirigoro gami navasiana aginami maga: Euga wo lawo ki namatada maga naga euga nadi ki gami paki natano.

¹²E dakiusi laion waina e masauna naga ega katip̃oraworae, Go e dakiusi laion tureai waina e one tokora ni natokolokuana maga.

¹³P̃a tuleana, Yehovah O, Pa vaki kivea ki naraena, p̃a mari a ega titip̃atua: P̃a vualua naatagu m̃elu dua ki tea sigisigileo ki lova anigo;

¹⁴M̃elu dua ki naatam̃oli maga ki nam̃elearum̃a, Yehovah O, M̃elu dua ki naatam̃oli maga ni maramana, waina tea veanip̃otaeana adeada e doko namauriana waia, Go waina p̃a wo pakavuro nap̃eleda ki tea tauakiana anigo: Euga wo maro nalaapaana ni natuda maga, Po magi pipia adeada maga ligiraki naloriki laapa adeada.

¹⁵Kinau, aga wo leopunusi naraem̃a doko namarinaleoleanaana: Ragi waina aga wo darapa, aga wo maro navunusi‐ko‐ana.