Read Nguna Togoa Etafe North SALAMO 18 Bible Online

SALAMO 18 - Nguna Togoa Etafe North bible

SALAMO 18

¹Salamo sikai ki David, tea suasua ki Yehovah, waina e pasa ki Yehovah navasaana maga ni nalegaana waia naaleatia waina Yehovah e pualua e m̃elu dua ki nam̃elearu ni tea kokona ki nia maga mamau puti, go m̃elu dua ki nam̃elearu ni Saul: go e naga, Aga wo dodomi ko, Yehovah O, nakasuaana aginau.

²Yehovah e pei vatu laketoko aginau, go nasum̃a ni p̃aaka aginau, go tea vualua au; Sup̃e aginau, vatu laketoko kasua aginau, aga wo pavatu asa; Nakokoro aginau, go napati ni nap̃au ni namautipauri‐au‐ana, tokora vakilagi aginau.

³Aga wo pioso paki Yehovah, waina e pei tea waina ega vei tea samasamaniana: Go aga wo pei tea mautipauriana m̃elu dua ki tea kokona ki nau maga.

⁴Natali maga ni namateana eu dalivirigoro au, Go noai sara maga ni nasigisigileoana eu mari au a mataku.

⁵Natali maga ni Sheol eu dalivirigoro au: Vaivai maga ni namateana eu sua au.

⁶Aga wo pioso paki Yehovah nariesoki‐au‐ana, Go aga wo kuapioso paki Sup̃e aginau: Ega wo dogo nadaleogu pae nasum̃a tapu aneana Go nakuapiosoana aginau naraena ega wo sili nadaligana maga.

⁷Go maramana e nuanua po duruuru, Go laketano maga ni tava maga eu parivari Po pei tea nuanuakiana, nalakena e maeto.

⁸Naasua e sake namaetoana aneana, Go nakapu waina e m̃elu nawokana e do ganikani: Nam̃elevara vavaga maga eu pei tea tokoniana asa.

⁹Go e kolo ki nakoroatelagi maga po siwo umai; Go namaligo ni napopouru e doko etano ki nam̃elena maga.

¹⁰Go e sakesaake kerub sikai, po diri: Go e diri m̃araverave doko nalivaru maga ni nalagi.

¹¹E mari namaligo e pei tokora ni natokolokuana aneana, tap̃aup̃au aneana dalivirigoro e; Namaligo ni noai maga, napopouru maligo maga ni nakoroatelagi.

¹²Nalakena namarama ni kivea ki nia napopouru maligo aneana maga eu pano, Usa ni vatu go nam̃elevara vavaga maga ni nakapu.

¹³Go Yehovah e mari tovae e kati nakoroatelagi maga, Go Tea Vakilagi mau e pitua ki nadaleona; Usa ni vatu go nam̃elevara vavaga maga ni nakapu.

¹⁴Go e dipe ki nalua aneana maga, po daperavera ki da; Go ki navila laapa, po marimatua ki da.

¹⁵Go nam̃orua maga ni noai maga eu pei tea vunusiana, Go laketano maga ni maramana eu dokolina, Nalakena navasakasuaana anigo, Yehovah O, Nalakena suidaka ni namero ni namaetoana anigo.

¹⁶Ega wo dip̃akilua pae elagi umai, ega wo puati au; Ega wo dosagi au m̃elu dua ki noai laapa.

¹⁷Ega wo pualua au m̃elu dua ki tea kokona ki nau waina e kasua, Go ki tea maga waina eu pilosi au, nalakena eu kasua liu au.

¹⁸Euga wo sua au naaleatia ni nariesoki‐au‐ana: Ma Yehovah e pei tea silae au.

¹⁹Go e piragilua au paki tokora welewelea sikai; Ega wo pualua au, nalakena e maro au.

²⁰Yehovah ega wo lagatidua au ega vae namarinaleoleanaana aginau; Ega wo dua au liliu ega vae natautauana ni nam̃elearugu maga.

²¹Nalakena a pavaigoro napua ki Yehovah, Go a da sigisigileo m̃elu dua ki Sup̃e aginau mau.

²²Nalakena navasap̃otaeana aneana maga mamau puti eu doko naraegu, Go aga wo da mari natawonakiana aneana maga euga m̃elu dua ki nau pano mau.

²³Go a p̃ialua sikoti a, Go a dum̃agu pavaigoro au m̃elu dua ki namarinaleotageleana aginau.

²⁴Go Yehovah e dua au liliu pae namarinaleoleanaana aginau, Pae natautauana ni nam̃elearugu maga kivea ki namatana maga.

²⁵Paki tea dodomi‐dodomiana p̃a wo maridodomi; Paki naatam̃oli wialua p̃a wo marip̃ialua;

²⁶Paki tea tautau p̃a wo maridautau; Go paki tea tagele p̃a wo maridagele.

²⁷Nalakena nigo p̃a wo mautipauri narei rogokitesa; Ma namata vakilagi maga p̃a wo mari ra euga vakitano.

²⁸Nalakena nigo p̃a wo dokoni nasulu aginau: Yehovah Sup̃e aginau ega wo maramalagati namaligo aginau.

²⁹Nalakena pae ako aga wo sava sua taua sikai; Go pae Sup̃e aginau aga wo diri kalau nakoro ni vatu sikai.

³⁰Sup̃e, napua aneana e p̃ialua: Nanoaana ki Yehovah e pei tea maridogoana; Nae e magi tea maga mamau puti waina eu pavatu asa pei nakokoro sikai.

³¹Nalakena sei e pei Sup̃e masale ki Yehovah? Go sei e pei vatu laketoko masale ki Sup̃e aginami?

³²Sup̃e waina e do dasoki au ki nakasuaana, Po do mari napua aginau e p̃ialua.

³³E do mari nam̃elegu maga ero dakiusi nam̃ele ni diir maga: Go e do mari au a lawodu tokora vakilagi aginau maga.

³⁴E do pisei ki nam̃elearugu naga eroga mari navakalo; Go narugu ero puap̃elua ki naasu ni brass sikai.

³⁵Go ku dua au nakokoro ni namautipauriana anigo: Go nam̃elearum̃a ni matua ega wo silae au, Go navakaleana anigo ega wo mari au aga warua.

³⁶P̃a wo marip̃elewelea ki navasiana aginau maga etano ki nau, Go nam̃elegu maga eroga wo da pa parasai mau.

³⁷Aga wo sava dausi tea kokona ki nau maga, po pa parati ki da: Go aga wo da liliu mau pa pa aga wo mari ra euga nopu.

³⁸Aga wo atu ra, go euga wo da mariatae duleana mau: Euga wo dowo etano ki nam̃elegu maga.

³⁹Go ku dasoki au ki nakasuaana paki navakalo: P̃a wo mari tea maga waina eu duleana dip̃a au euga titip̃atua pakitano ki nau.

⁴⁰Go ku mari tea kokona ki nau maga eu atutaku ki nau, Go tea vilosi au maga, aga wo mari ra euga vunuta.

⁴¹Euga wo kuapioso, ma tea vualua e dika: Paki Yehovah, ma e da pasadara ra mau.

⁴²Go aga wo p̃okap̃oraworae ra euga tapala nam̃otam̃ota narae ni nalagi: Aga wo dakilua ra euga tapala nalepa ni napua maga ni natokoana.

⁴³P̃a wo pualua au m̃elu dua ki navululuana ki narei; P̃a wo mari au aga vei nap̃au ni nalauna maga: Narei waina a da atae ra mau euga wo maginau suasua.

⁴⁴Ragi waina euga wo dogo au euga wo dogo parati ki nau: Tea ni navanua p̃ota maga euga wo doko etano sorosoro paki nau.

⁴⁵Tea ni navanua p̃ota maga euga wo manainai. Go euga wo durururu umai m̃elu dua ki tokora kokoroana adeada maga.

⁴⁶Yehovah e mauri; go vatu laketoko aginau ega vei tea vasap̃iakiana; Go Sup̃e ni namautipauri‐au‐ana ega wo pei tea vakilagi:

⁴⁷Sup̃e waina e do maginau mari nasikosikoana maga, Go e mari narei maga eu doko etano paki nau.

⁴⁸E do paulua au m̃elu dua ki tea kokona ki nau maga: Go p̃a wo sike au pakilagi m̃elu dua ki tea maga waina eu duleana dip̃a au: P̃a wo pualua au m̃elu dua ki naatam̃oli ni namaripavakotoana.

⁴⁹Nalakena tea wanogoe aga wo pasadodom̃ata ki‐go, Yehovah O, m̃aleoputo ni nalauna maga, Go aga wo lega‐samasamani nagisam̃a.

⁵⁰E do magi nawota aneana mari namautipauriana warua maga; Go e do magi tea vuvuraikiana aneana mari nadodomiana, E do magi David go naworaworana mari a, pa pa e du mau du.