Read Nguna Togoa Etafe North SALAMO 20 Bible Online

SALAMO 20 - Nguna Togoa Etafe North bible

SALAMO 20

¹Salamo sikai ki David. Yehovah ega vasadara ko naaleatia ni nariesokiana; Nagisa ni Sup̃e ki Yakob ega sike ko pakilagi;

²Ega manigo dip̃akilua nasilaeana pae tokora tapu umai, Go ega silae ko pae Sion umai;

³Ega midoa ki navituaana anigo maga mamau puti, Go ega tape naviriana tap̃arakiana anigo; Selah.

⁴Ega tua ko ega vae nap̃op̃om̃a, Go ega vakavuro namidoakip̃otaeana mamau anigo.

⁵Auga wo kolalaelaea namautipauriana anigo, Go auga wo sike manututu aginami maga nagisa ni Sup̃e aginami: Yehovah ega vakavuro natatagoana anigo maga mamau puti.

⁶Ragi waia a atae naga Yehovah e mautipauri tea vuvuraikiana aneana; Ega wo pasadara e pae nakoroatelagi tapu aneana maga umai Ki namarimatuaana maga ni namautipauriana ni nam̃elearuna ni matua.

⁷Seara eu pavatu kariot maga, go seara horse maga: Ma kinami auga wo midoakinoa nagisa ni Yehovah Sup̃e aginami.

⁸Nara eu ditip̃atua po dowo: Ma kinami au duleana po lawodu leana.

⁹Yehovah O, p̃a mautipauri: Nawota ega vasadara gami naaleatia waina auga wo pioso asa.