Read Nguna Togoa Etafe North SALAMO 22 Bible Online

SALAMO 22 - Nguna Togoa Etafe North bible

SALAMO 22

¹Salamo sikai ki David. Sup̃e aginau, Sup̃e aginau, ekasana ko doropusi au? Ekasana ku madu uvea ki nasilaeau‐ana, go ki navasaana maga ni nauruana aginau?

²Sup̃e aginau O, a do pioso aleati, ma ku da pasadara mau; Go p̃ogi, go a da punuta mau.

³Ma nigo ku dapu, Waina ku do doko nasamasamaniana maga ki Israel.

⁴Tamagami maga eu pavatu ako: Eu pavatu, go ku pualua ra.

⁵Eu kuapioso paki‐go, po pei tea vualuaana: Eu pavatu ako, po da maliere mau.

⁶Ma kinau a pei asulati sikai, go a da pei naatam̃oli mau: Tea vasapinoakiana sikai ki naatam̃oli maga, go tea midoakip̃alokiana ki narei.

⁷Tea maga mamau puti waina eu do punusi au eu do pasasaudoa ki nau: Eu do maga ki nagoleda, eu do ligiligi p̃au, eu naga,

⁸P̃a vavatu Yehovah; ega wo pualua e: Ega wo pualua e, nalakena e maro asa.

⁹Ma nigo ku piragi au m̃elu dua ki nap̃ele: Ku mari au a pavatu ragi waina a doko nasusu maga ni p̃ilagu.

¹⁰A pei tea nadikiana paki‐go pae nasum̃a ni kanao: Nigo ku pei Sup̃e aginau pae nap̃ele ni p̃ilagu.

¹¹P̃a ta madu uvea ki nau mau; nalakena nariesokiana e pei m̃aladigi; Nalakena tea silae e dika.

¹²Kau natuda tureai laapa eu dalivirigoro au: Tea kasua maga ni Bashan eu lawodu dalivirigoro au.

¹³Eu maga paki nau ki nawokada, Dapala laion sikai waina e katip̃orae po uru.

¹⁴A pei tea takiana dakiusi noai, Go navatugu maga mamau puti eu lawo pele kolopuda: Nam̃ogu e dakiusi waks; E sara m̃aleoputo ni namaritagu maga.

¹⁵Nakasuaana aginau e lologara dakiusi matele sikai ni lasa ni naruku; Go namenagu e puluti nasigu maga; Go ku piragi au paki nam̃otam̃ota ni namateana.

¹⁶Nalakena koria maga eu dalivirigoro au: Taua sikai ni tea mari naleo sa maga eu lawodu dalivirigoro au: Eu turisai nam̃elearugu maga go nam̃elegu maga.

¹⁷A mariatae peve puti navatugu maga; Nara eu do leopunusi au po do siko au:

¹⁸Eu madeada p̃otae sugoro aginau maga eu sarasara ra, Go tea suniana aginau eu nadi ki gole asa.

¹⁹Ma nigo, Yehovah, p̃a ta madu uvea mau: Nakasuaana aginau, p̃a mari m̃araverave naga p̃a silae au.

²⁰P̃a vualua naatagu m̃elu dua ki lova: Sikedau aginau m̃elu dua ki nam̃elearu ni koria.

²¹P̃a mautipauri au pa dua ki nawoka ni laion; Go ku po pasadara au pae napati maga ni nap̃au ni oks mila maga.

²²Aga wo dogorogo ki nagisam̃a paki taigu maga: Aga wo samasamani ko m̃aleoputi ni nasaisaiana.

²³Tea matau ki Yehovah maga, kuga samasamani a; Tea maga mamau puti waina ku pei naworawora ni Yakob, kuga dodomadagani a; Go kuga mataku pa dua ki nia, tea maga mamau puti waina ku pei naworawora ni Israel.

²⁴Nalakena e da midoakip̃alo ki go e da mamarago ki narogokitesaana ki tea rogokitesa mau; Go e da dasuru ki naraena paki nia mau; Ma ragi waina e kuapioso paki nia, e dogo.

²⁵Nasamasamaniana aginau nasaisaiana warua e pae ako umai: Aga wo lagatipitua ki nasaiana aginau maga narae ni tea maga waina eu matau ki nia.

²⁶Tea matemate maga euga wo ganikani po puka: Tea maga waina eu do laaga Yehovah euga wo samasamani a: Nap̃op̃omu ega mauri pa pa ega tu mau du.

²⁷Namatap̃ago maga mamau puti ni maramana euga wo midodoa po maradoa paki Yehovah: Go naworawora maga mamau puti ni nalauna maga euga wo suai natano naraem̃a.

²⁸Nalakena namarakiana e pei agi Yehovah: Go nae e pei tea maramara m̃aleoputo ni nalauna maga.

²⁹Tea m̃anopunopu maga mamau puti ni maramana euga wo ganikani po suai natano: Tea maga mamau puti waina eu do siwo paki nam̃otam̃ota euga wo ditip̃atua naraena, Go tea waina e marisap̃o mauti naatana e mauri doko.

³⁰Naworawora sikai euga wo maneana suasua; Ega wo pei tea rogorogokiana nalo ni Nawota paki tagona waina ega wo umai.

³¹Euga wo umai po dogorogo ki namarinaleoleanaana aneana Paki narei waina euga wo pakilina, naga e mari a.