Read Nguna Togoa Etafe North SALAMO 25 Bible Online

SALAMO 25 - Nguna Togoa Etafe North bible

SALAMO 25

¹Salamo sikai ki David. Yehovah O, aga wo sike naatagu paki‐go.

²Sup̃e aginau O, a pavatu ako, Aga ta maliere mau; Tea kokona ki nau maga euga ta darasa nalo kakagu mau.

³Go te sikai ni tea maga waina eu do leogoro ako ega wo da maliere mau: Tea maga waina eu do mari malauweluki p̃alo euga wo maliere.

⁴Napua anigo maga, Yehovah O, p̃a mari au aga atae ra; P̃a vasapisei ki nau napua anigo maga.

⁵P̃a mari au aga surata nalomauana anigo, go p̃a vasapisei ki nau; Nalakena nigo ku pei Sup̃e ni namautipauri‐au‐ana; A do leogoro ako naaleatia mamau.

⁶P̃a midoa ki namaritadodomiana anigo maga, Yehovah O, go nadodomipakaleana anigo maga; Nalakena nara eu doko pae tuai pa pa e du mau du.

⁷Namarinaleosaana maga ni ragi ni naveinatureaiana aginau, go natapiriana aginau maga p̃a ta midoa ki da mau: Nigo p̃a midoa ki nau ega vae nadodomiana anigo, Nalakena nawiaana anigo, Yehovah O.

⁸Yehovah e p̃ia go e leana: Nalakena tea wanogoe ega wo digipisei‐ki tea mari naleo sa maga napua.

⁹Ega wo maraki tea matemate maga navasap̃otaeana: Ega wo pasapisei ki tea matemate maga napua aneana.

¹⁰Napua maga mamau puti ki Yehovah eu pei nadodomiana go nalomauana Paki tea maga waina eu do dogo parati ki navasasokiana aneana go nanoasokisokiana aneana maga.

¹¹Nalakena nagisam̃a, Yehovah O, P̃a maginau midoakikorokoro namarinaleotageleana aginau, nalakena nae e p̃arua.

¹²Naatam̃oli sei waina e matau ki Yehovah? Ega wo digipisei ki nia napua waina ega wo matadoa e.

¹³Naatana ega wo doko tea wia; Go naworaworana euga wo peanipioli ki navanua.

¹⁴Namidoakip̃otaeana ki Yehovah e pei agi tea maga waina eu matau ki nia, Go navasasokiana aneana naga ega mari ra euga atae.

¹⁵Namatagu ero paki Yehovah sara ragi; Nalakena nae ega wo pualua nam̃elegu eroga m̃elu dua ki kup̃ena.

¹⁶P̃a tum̃am̃a doa ko paki nau, go p̃a saup̃ia ki nau; Nalakena kinau a sikigu doko go a dogokitesa.

¹⁷Nariesokiana maga ni nap̃op̃ogu eu pei tea mariana eu p̃elewelea; P̃a viragilua au m̃elu dua ki nap̃alaasa aginau maga.

¹⁸P̃a vunusi narogokitesaana aginau go nawosimawosaana aginau; Go p̃a maginau midoakikorokoro namarinaleosaana aginau maga mamau puti.

¹⁹P̃a vunusi tea kokona ki nau maga, nalakena eu laapa; Go eu pilosi au ki navilosiana ni namaripavakotoana.

²⁰P̃a vavaigoro naatagu, go p̃a vualua au: Aga ta maliere mau, nalakena a pavatu ako.

²¹Nawialuaana go naleanaana eroga wo pavaigoro au, Nalakena a do leogoro ako.

²²Sup̃e O, p̃a taulua Israel Ega m̃elu dua ki nariesoki‐a‐ana maga mamau puti.