Read Nguna Togoa Etafe North SALAMO 27 Bible Online

SALAMO 27 - Nguna Togoa Etafe North bible

SALAMO 27

¹Salamo sikai ki David. Yehovah e pei namarama aginau go namautipauri‐au‐ana; aga matau ki sei? Yehovah e pei p̃aaka ni namauriana aginau; aga m̃anaunau nalakena sei?

²Ragi waina tea marinaleosa maga eu rumai paki m̃aladigi ki nau naga euga kani nap̃okasigu, Tea riesoki au maga go tea kokona ki nau maga, nara eu darataara po dowo.

³Taua ni naatam̃oli maga eu pe m̃enaki goro au, Nap̃op̃ogu e pe ta mataku mau: Navakalo e pe vakilina ki nau, Ragi wanogoe kinau a pe vavatu doko.

⁴A datagovi Yehovah ki tea sikai maau, tea wanogoe aga wo do laaga asa; Naga aga toko nasum̃a ki Yehovah naaleatia maga mamau puti ni namauriana aginau, Naga aga to leopunusi namasauniana ni Yehovah, go naga aga to pusuusu ekopu ni nasum̃a tapu aneana.

⁵Nalakena ega wo dasuru ki nau tap̃aup̃au aneana naaleatia ni nasaana: Ega wo dasuru ki nau tokora ni natokolokuana ni tap̃aup̃au aneana; Ega wo sike au sake paki vatu laketoko sikai.

⁶Go ragi waia nap̃augu ega wo pei tea sikeana pakilagi dap̃au tea kokona ki nau maga dalivirigoro au; Go aga wo mari naviriana maga ni namarip̃arai‐laelaeaana tap̃aup̃au aneana; Aga wo lega, go aga wo legasamasamani Yehovah.

⁷P̃a rogo, Yehovah O, aga vioso ki nadaleogu: P̃a saup̃ia ki nau, go p̃a vasadara au.

⁸Ragi waina ku naga, Kuga laaga naraegu; nap̃op̃ogu e noa ki‐go, Aga laaga naraem̃a, Yehovah O.

⁹P̃a ta dasuru ki naraem̃a paki nau mau; P̃a ta dip̃atip̃a tea suasua anigo namaetoana mau: Ku pei tea silae au; P̃a ta siva ki nau mau, p̃a ta doropusi au mau, Sup̃e ni namautipauri‐au‐ana.

¹⁰Nalakena tamagu go p̃ilagu ero doropusi au, Ma Yehovah ega wo piragisoki au.

¹¹P̃a rigipisei ki nau napua anigo, Yehovah O; Go p̃a maraki au napua leana, Nalakena tea kokona ki nau maga.

¹²P̃a ta pitua ki nau paki namasauana ki tea riesoki au maga mau: Nalakena tea noasokisoki sorosoro maga eu duleana dip̃a au, go tea waina e marousu ki namaripavakotoana.

¹³A pe ta saralomau naga aga leopunusi nawiaana ki Yehovah Navanua ki tea mauri maga mau, a pe tapale sava?

¹⁴P̃a leogoro Yehovah: P̃a kasua, go nap̃op̃om̃a ega marasike; Go p̃a leogoro Yehovah.