Read Nguna Togoa Etafe North SALAMO 30 Bible Online

SALAMO 30 - Nguna Togoa Etafe North bible

SALAMO 30

¹Salamo sikai; Nalegaana sikai ni Naveakotokotomauana ni Nasum̃a. Salamo sikai ki David. Aga wo pasasike ko pakilagi, Yehovah O; nalakena ku po puati au sake, Go ku da mari tea kokona ki nau maga eu laelaea nalo kakagu mau.

²Yehovah, Sup̃e aginau O, A kuapioso paki‐go, go ku maripauri au.

³Yehovah O, ku po piragi naatagu e pae Sheol sake umai: Ku po mari au a mauri doko, naga aga ta siwo paki m̃oru pano mau.

⁴Kuga lega‐samasamani Yehovah, tea dodomi‐dodomiana aneana maga, Go kuga vasadodom̃ata ki nagisana tapu.

⁵Nalakena namaetoana aneana e doko ragi ni nawilimataana sikai; Namauriana e doko nasaup̃iaana aneana: Ragi melu nakaiana ega wo umai m̃enaki, Ma nakolalaelaeaana ega wo umai malip̃ogi.

⁶Ma kinau a noa, ragi waina a doko dam̃ate, a naga, Aga wo da parivari mau pa pa ega tu mau du.

⁷Yehovah O, ki nasaup̃iaana anigo ku mari tava aginau e lawodu kasua: Ku dasuru ki naraem̃a; go a m̃anaunau.

⁸Aga vioso paki‐go, Yehovah O; Go aga vavarani Yehovah naga ega saup̃ia ki nau:

⁹Seve nataluaana e doko nadagu, ragi waina aga siwo paki m̃oru pano? Nam̃otam̃ota ega wo samasamani ko kite? Ega rogorogo ki nalomauana anigo kite?

¹⁰P̃a rogo, Yehovah O, go p̃a saup̃ia ki nau: Yehovah O, p̃a vei tea silae au.

¹¹Ku po maginau doa nalalagaarovaana aginau e pei nasaleana; Ku po peresilua nakulukulu ni sak aginau, po dasoki au ki nalaelaeaana:

¹²Naga nasamasamaana ega legasamasamani ko, po da punuta mau. Yehovah, Sup̃e aginau O, aga wo pasadodom̃ata ki‐go pa pa ega tu mau du.