Read Nguna Togoa Etafe North SALAMO 31 Bible Online

SALAMO 31 - Nguna Togoa Etafe North bible

SALAMO 31

¹Salamo sikai ki David. Yehovah O, a pavatu ako; aga ta maliere mau pa pa ega tu mau du: P̃a vualua au doko namarinaleoleanaana anigo.

²P̃a ta ki nadaligam̃a paki nau; p̃a vualua au m̃araverave: P̃a maginau pei vatu laketoko kasua sikai, nasum̃a sikai ni p̃aaka maga naga p̃a mautipauri au.

³Nalakena nigo ku pei vatu laketoko aginau go nasum̃a ni p̃aaka aginau; Go nalakena nagisam̃a p̃a maraki au po pitana ki nau.

⁴P̃a vualua au m̃elu dua ki kup̃ena waina eu dasuru ki nia raki nau; Nalakena nigo ku pei p̃aaka kasua aginau.

⁵Aga toropusi naatagu paki nam̃elearum̃a: Ku daulua au, Yehovah O, Sup̃e ni nalomauana.

⁶A pilosi tea maga waina eu do pavaigoro nalo p̃alo maga ni nasorosoroana: Ma kinau a pavatu Yehovah.

⁷Aga wo sokamidi po laelaea nadodomiana anigo: Nalakena ku punusi narogokitesaana aginau; Ku atae nariesokiana maga ni naatagu:

⁸Go ku da kokoro au paki nam̃elearu ni tea kokona mau; Ku mari nam̃elegu ero lawodu tokora welewelea sikai.

⁹P̃a saup̃ia ki nau, Yehovah O, nalakena a pei tea riesokiana: Namatagu e m̃odave ki nap̃op̃osaana, naatagu go nap̃elegu.

¹⁰Nalakena namauriana aginau e sirinopu ki nasusueana, go natau aginau maga ki nagiana: Nakasuaana aginau e darataara nalakena namarinaleotageleana aginau, go navatugu maga eu dosa.

¹¹Nalakena tea kokona ki nau maga mamau puti a pei tea vasapinoakiana sikai, Go p̃arua ki nia paki tea ni m̃aladigi ki nau maga, go a pei tea mataukiana sikai paki tea atae au maga: Tea maga waina eu punusi au katama eu sava dua ki nau pano.

¹²A pei tea maliokiana dakiusi tea mate sikai pa dua ki namidodoana: A dakiusi lasa mawora sikai.

¹³Nalakena a dogo navinoaana ki tea laapa, Namatakuana e doko daliviri: Ragi waina eu saisai seke dip̃a au, Eu midoa ki nia naga euga tapelua namauriana aginau.

¹⁴Ma kinau a pavatu ako, Yehovah O: A naga, Nigo ku pei Sup̃e aginau.

¹⁵Ragi aginau maga eu doko nam̃elearum̃a: P̃a vualua au m̃elu dua ki nam̃elearu ni tea kokona ki nau maga, go ki tea kopalele au maga.

¹⁶P̃a mari naraem̃a ega maramalaga paki tea suasua anigo: P̃a mautipauri au doko nadodomiana anigo.

¹⁷Aga ta maliere, Yehovah O; nalakena a pioso paki‐go: Tea sigisigileo maga euga maliere, euga vunuta doko Sheol.

¹⁸Nagole sorosoro maga euga vei pusa; Waina eu do pasa paka laapa dip̃a tea leana, Ki naleomadagaana go namidoakip̃alokiana.

¹⁹Nawiaana anigo e p̃arua pa, waina ku magi tea matau ki‐go maga daua ki nia, Waina ku magi tea vavatu ako maga p̃osiwosi ki nia kivea ki naatam̃oli natuda maga!

²⁰P̃a wo dasuru ki da tokora ni natokolokuana ni naraem̃a pa dua ki nasekeana maga ki naatam̃oli: P̃a wo dasuru ki da tap̃aup̃au sikai pa dua ki navululuana ni namena maga.

²¹Yehovah ega vei tea vasap̃iakiana: Nalakena e po mari nadodomiana aneana paki nau e pei tea ni namagaana natokoana sikai waina e pei p̃aaka.

²²Go kinau a noa ragi waina a mataku, a naga, A pei tea taeluaana m̃elu dua ki kivea ki namatam̃a maga: Ma ku dogo nadaleo ni navavaraniana aginau maga ragi waina a pioso paki‐go.

²³Kuga dodomi Yehovah, tea dodomi‐dodomiana aneana maga mamau puti: Yehovah e do pavaigoro tea vei lomau maga, Go e do lagatidua p̃arua ki tea marileomadaga.

²⁴Kuga kasua, go nap̃op̃omu ega marasike, Tea maga mamau puti waina ku do leogoro Yehovah.