Read Nguna Togoa Etafe North SALAMO 32 Bible Online

SALAMO 32 - Nguna Togoa Etafe North bible

SALAMO 32

¹Salamo sikai ki David, Maskil. Ae namaropaana ki tea waina natapiriana aneana e pei tea tapeluaana, waina namarinaleosaana aneana e pei tea tap̃augoroana!

²Ae namaropaana ki naatam̃oli waina Yehovah e da midoakidip̃a e namarinaleotageleana mau, Go waina te nasorosoroana e da doko naatana mau!

³Ragi waina a punuta doko, navatugu maga eu disu duai Nalakena nauruana aginau naaleatia mamau.

⁴Nalakena aleati go p̃ogi nam̃elearum̃a e madaga doko au: Nasuagu e pei tea roaana paki nagaragaraana ni ragi ni sui. Selah.

⁵A mari namarinaleosaana aginau e pei tea ataeana paki‐go, go a da dasuru ki namarinaleotageleana aginau mau: A naga, Aga noasai paki Yehovah natapiriana aginau maga; Go nigo ku dapelua namarinaleotageleana ni namarinaleosaana aginau. Selah.

⁶Nalakena tea wanogoe sara naata waina eu pei tea saralomau mamau euga tapasavasa paki‐go ragi waina p̃a wo pei tea vap̃aiana asa: Lomau ragi ni natave ni noai laapa euga wo da pa‐parati ki da mau.

⁷Nigo ku pei tokora ni natokolokuana aginau; p̃a wo mauti au ki nariesokiana; P̃a wo dalivirigoro au ki nakolalaelaeaana maga ni navualuaana. Selah.

⁸Aga wo pasapisei ki‐go po digipisei ki‐go napua waina p̃a wo surata pae asa: Aga wo pasa parati ki‐go, namatagu ega wo doko ako.

⁹Kuga ta dakiusi horse, kite mule, waina e dika ni namidoakiataeana: Waina narekeiana kakana e pei tea katiana go tea liko naga ega vei tea vuasokiana asa, Nalakena e da umai paki m̃aladigi ki‐go mau.

¹⁰Narogokitesaana laapa eu pei agi tea sigisigileo: Ma tea waina e pavatu Yehovah nadodomiana ega wo dalivirigoro e.

¹¹Kuga laelaea Yehovah, po sokamidi, tea leana maga: Go kuga kola‐laelaea, tea maga mamau puti waina ku pei tea p̃op̃o leana.