Read Nguna Togoa Etafe North SALAMO 34 Bible Online

SALAMO 34 - Nguna Togoa Etafe North bible

SALAMO 34

¹Salamo sikai ki David; ragi waina e mari namidodoana aneana e panop̃ota narae ni Abimelek, waina e kopasilua e, go e pano. Aga wo pasap̃ia ki Yehovah sara ragi: Nasamasamani‐a‐ana ega wo doko mau doko nawokagu.

²Naatagu ega wo pakavakae Yehovah: Tea matemate maga euga wo dogo e, po laelaea.

³Kuga sikoti au noa naga Yehovah e p̃arua, Go tuga mamau sike nagisana ega vakilagi.

⁴A laaga Yehovah, go e pasadara au, Po pualua au m̃elu dua ki namatakuana aginau maga mamau puti.

⁵Eu leo paki nia, po maramalaga: Go naraeda euga wo da matamaliere mau.

⁶Tea rogokitesa waia e pioso, go Yehovah e dogo e, Po mautipauri a m̃elu dua ki nariesoki‐a‐ana maga mamau puti.

⁷Agelo ki Yehovah e do m̃enaki dalivirigoro tea maga waina eu matau ki nia, Go e pualua ra.

⁸Kuga katidogo po punusi naga Yehovah e p̃ia: Ae namaropaana ki naatam̃oli waina e do pavatu asa!

⁹Kuga matau ki Yehovah, tea tautau aneana maga: Nalakena tea matau ki nia maga eu da dika mau.

¹⁰Laion tureai maga eu dika, po pitolo: Ma tea maga waina eu laaga Yehovah euga wo da dika ki te navatuna wia mau.

¹¹Kuga umai, piakirikiri, kuga rogo au: Aga wo pasapisei ki mu namatauki‐Yehovah‐ana.

¹²Naatam̃oli sei waina e masau namauriana, Po dodomi naaleatia maga, naga ega vunusi tea wia?

¹³P̃a vavaigoro namenam̃a ega va dua ki tea sa, Go nagolem̃a naga eroga ta pasa nasorosoroana mau.

¹⁴P̃a tawasi m̃elu dua ki tea sa, go p̃a mari tea wia; P̃a laaga natam̃ateana, go p̃a sava dausi a.

¹⁵Namata ni Yehovah ero paki tea leana maga, Go nadaligana ero paki nakuapiosoana adeada.

¹⁶Narae ni Yehovah e dip̃a tea maga waina eu do mari naleo sa, Naga ega taelua namidoa‐ki‐da‐ana m̃elu dua ki maramana.

¹⁷Tea leana maga eu kuapioso, go Yehovah e dogo, Po pualua ra m̃elu dua ki nariesoki‐ra‐ana maga mamau puti.

¹⁸Yehovah e pei m̃aladigi ki tea maga waina nap̃op̃oda e maworawora, Go e do mautipauri tea maga waina naatada e pei tea marip̃oroworosiana.

¹⁹Nasaana ki tea leana eu laapa: Ma Yehovah e do pualua e m̃elu dua ki puti ra.

²⁰E do pavaigoro puti navatuna maga: Sikai kakada e da mawori mau.

²¹Nasaana ega wo maripunue tea sigisigileo: Go tea maga waina eu pilosi tea leana euga wo pei tea tip̃akotoviana.

²²Yehovah e do daulua naata ni tea suasua aneana maga: Go tea maga waina eu do pavatu asa sikai kakada ega wo da pei tea tip̃akotoviana mau.