Read Nguna Togoa Etafe North SALAMO 35 Bible Online

SALAMO 35 - Nguna Togoa Etafe North bible

SALAMO 35

¹Salamo sikai ki David. P̃a vululu, Yehovah O, ki tea waina eu pululu ki nau: P̃a mari tea waina eu mari au.

²P̃a vuati sila go nakokoro, Go p̃a tuleana naga p̃a silae au.

³Go p̃a sailua naio, go p̃a tugoro dip̃a tea sava dausi au maga. P̃a noa ki naatagu, Kinau a pei namautipauri‐ko‐ana.

⁴Tea maga waina eu laaga naatagu euga maliere po pei tea dododaoana: Tea maga waina eu midoa ki namarisaki‐nau‐ana euga vei tea mariana euga liliu pano po matamaliere.

⁵Euga takiusi nap̃olaga narae ni nalagi, Go agelo ki Yehovah ega to dosiva ki da.

⁶Napua adeada ega maligo go ega m̃arasarasa, Go agelo ki Yehovah ega to sava dausi ra.

⁷Nalakena eu dasuru ki m̃orutano ni kup̃ena adeada raki m̃oli ki nau, Eu kili m̃orutano sikai raki m̃oli ki naatagu.

⁸Namarisakiana ega vakilina ki nia ragi waina e da atae a mau; Go kup̃ena aneana waina e dasuru ki nia ega soli a: Paki namarisakiana wanogoe ega rowo paki asa.

⁹Go naatagu ega wo laelaea Yehovah: Ega wo sokamidi namautipauriana aneana.

¹⁰Navatugu maga mamau puti euga wo naga, Yehovah, sei e dakiusi ko, Waina ku do pualua tea rogokitesa m̃elu dua ki tea waina e kasua liu sa, Go tea rogokitesa go tea tika m̃elu dua ki tea waina e do putilua kiana?

¹¹Tea noasokisoki maga ni namaripavakotoana eu duleana; Eu pusuusu paki nau ki tea waina a da atae a mau.

¹²Eu lagati dua au tea sa dip̃a tea wia, Navutiluaana paki naatagu.

¹³Ma kinau, ragi waina eu sasana, tea suniana aginau e pei nakulukulu ni sak: A mari naatagu e dogokitesa ki navaliana; Go natapasavasaana aginau ega wo liliu paki narum̃agu.

¹⁴A do mari dapala e pe vei tagu ri kite taigu: A do malepu kusukusu pano, dakiusi tea waina e susue p̃ilana.

¹⁵Ma ragi waina a pa‐sa eu laelaea, po saisai: Tea wokati maga eu saisai dip̃a au, go a da atae a mau; Eu puap̃orae au, po da makoto ki nia mau:

¹⁶Eu dapala tea sigisigileo saudoa maga ni nakaniana, Eu kati napatida paki nau.

¹⁷Nawota, p̃a wo punusi a pa pa paki seve ragi? P̃a viragi naatagu ega liliu m̃elu dua ki namarisakiana adeada maga, Sikedau aginau m̃elu dua ki laion tureai maga.

¹⁸Aga wo pasadodom̃ata ki‐go nasaisaiana warua: Aga wo samasamani ko m̃aleoputi ni naatam̃oli laapa.

¹⁹Tea kokona ki nau maga ni nasorosoroana euga ta laelaea nalo kakagu mau: Tea waina eu pilosi m̃oli ki nau euga ta p̃ilimata mau.

²⁰Nalakena eu da pasa natam̃ateana mau: Ma eu midoa ki navasaana ni namarisoreana dip̃a tea matemate maga ni navanua.

²¹Go eu maga ki nawokada paki nau; Eu naga, Aha, aha, namatagida e po punusi a.

²²Ku punusi a, Yehovah O; p̃a ta punuta mau: Nawota O, p̃a ta madu uvea ki nau mau.

²³P̃a tarapa, po leleo paki navasap̃otae‐au‐ana, Sup̃e aginau go Nawota aginau, paki navululuana aginau.

²⁴P̃a vasap̃otae au ega vae namarinaleoleanaana anigo Yehovah Sup̃e aginau O: Go euga ta laelaea nalo kakagu mau.

²⁵Euga ta noa nap̃op̃oda, Aha, namasauana aginami: Euga ta naga, Au po dinomi a.

²⁶Tea maga waina eu laelaea nasaana aginau euga vei taua maliere po matamaliere: Tea maga waina eu mari madaga paki nau euga vei tea sugoroana ki namaliereana go nadododaoara‐ana.

²⁷Tea maga waina eu maro namarinaleoleanaana aginau euga kolalaelaea po laelaea: Go euga to noa sara ragi, Yehovah ega vei tea warua, Waina e maro natam̃ateana ki tea suasua aneana.

²⁸Go namenagu ega wo noa namarinaleoleanaana anigo, go nasamasamani‐ko‐ana naaleatia mamau.