Read Nguna Togoa Etafe North SALAMO 38 Bible Online

SALAMO 38 - Nguna Togoa Etafe North bible

SALAMO 38

¹Salamo sikai ki David, naga ega mari ega vei tea midoakiana. Yehovah O, p̃a ta pasa kasua ki nau namaetoana anigo mau: Go p̃a ta parati au namaritausuana anigo mau.

²Nalakena nalua anigo maga eu lawo au, Go nam̃elearum̃a e lawo au.

³Tokora wia sikai e da doko nap̃okasigu mau nalakena namaetoana anigo; Te natam̃ateana e da doko navatugu maga mau nalakena namarinaleosaana aginau.

⁴Nalakena namarinaleotageleana aginau maga eu dap̃augoro nap̃augu: Eu dapala natapetapeana madaga sikai eu madaga liu au.

⁵Wotu maga ni navarati‐au‐ana eu p̃oa, po pei naup̃oa, Nalakena naveilalasigisigileoana aginau.

⁶A pei tea vilokiana po kolokolo p̃arua liu; A do malepu pano naaleatia mamau.

⁷Nalakena namaritagu eu pura ki navavagaana; Go tokora wia sikai e da doko nap̃okasigu mau.

⁸A pinavinauta po maworawora p̃arua liu: A uru nalakena nagiana ni nap̃op̃ogu.

⁹Nawota, namasauana mamau aginau e doko kivea ki‐go; Go nagiana aginau e da pei tea tasurukiana paki‐go mau.

¹⁰Nam̃ogu e do tukituki, nakasuaana aginau e doropusi au: Go namarama ni namatagu maga, nae ma e da sikoti au mau.

¹¹Tea dodomi au maga go tagu ri maga euga wo lawodu pa dua ki narae ni naatugi‐au‐ana; Go tea ni m̃aladigi ki nau maga eu lawodu uvea.

¹²Go tea maga waina eu laaga naatagu eu lawo ki vaivai maga raki nau; Go tea maga waina eu laaga nasaana aginau eu pasa namarisakiana maga, Go eu do midoa ki namarisoreana maga naaleatia mamau.

¹³Ma kinau, dapala tea p̃aro sikai, a da dogo mau; Go a dapala tea waina e pei pusa waina e da p̃olagati nawokana mau.

¹⁴Go a doko dapala naatam̃oli sikai waina e da dogo mau, Go waina navululuana seara eu da doko nawokana mau.

¹⁵Nalakena a leogoro ako, Yehovah O: Nigo p̃a wo pasadara, Nawota Sup̃e aginau O.

¹⁶Nalakena a naga, Mase eu pe laelaea nalo kakagu: Ragi waina nam̃elegu e pa‐parasai eu marimadaga paki nau.

¹⁷Nalakena kinau a pei m̃aladigi naga aga va‐sa, Go nasusueana aginau e doko kivea ki nau sara ragi.

¹⁸Nalakena aga wo noasai namarinaleotageleana aginau; Aga wo mataku nalakena namarinaleosaana aginau.

¹⁹Ma tea kokona ki nau maga eu mauri doko, go eu kasua: Go tea vilosi au maga ni nasorosoroana eu po laapa.

²⁰Go tea maga waina eu lagatipitua ki tea sa dip̃a tea wia Eu marikokona paki nau, nalakena a do dausi tea waina e p̃ia.

²¹P̃a ta doropusi au mau, Yehovah O: Sup̃e aginau O, p̃a ta madu uvea ki nau mau.

²²P̃a mari m̃araverave naga p̃a silae au, Nawota O, namautipauri‐au‐ana.