Read Nguna Togoa Etafe North SALAMO 39 Bible Online

SALAMO 39 - Nguna Togoa Etafe North bible

SALAMO 39

¹Salamo sikai ki David. A noa naga, Aga wo pavaigoro napua aginau maga, Naga aga ta mari naleo sa ki namenagu mau: Aga wo pavaigoro nawokagu ki p̃auasi sikai, Ragi waina tea sigisigileo e doko naraegu.

²A pei pusa ki navunutaana, a punuta ki tea wia; Go nasusueana aginau e duletule.

³Nap̃op̃ogu e pivitinu nap̃alaugu; Ragi waina a do midodoa nakapu e pavaga: A pasa ki namenagu:

⁴Yehovah O, p̃a mari au aga atae naaleatia edaku aginau, Go navarauana ni naaleatia aginau maga, nae e dapale sava? P̃a mari au aga atae, aga wo m̃elu seve ragi?

⁵P̃a leo, ku pitua ki naaleatia aginau maga eu dapala naweleweleana ni nam̃elearu maga; Go ragi ni namauriana aginau e dapala tea waina e da doko mau naraem̃a: Lomau sara naatam̃oli waina eu lawodu eu pei tea p̃alo puti. Selah.

⁶Lomau naatam̃oli e do surata dapala melu sikai: Lomau eu do marip̃arai p̃alo: E do dauaki, go e da atae sei ega wo pilae a.

⁷Go ragi waia, Nawota O, a leogoro nasava? Naleogoroana aginau nae e doko ako.

⁸P̃a vualua au m̃elu dua ki natapiriana aginau maga mamau puti: P̃a ta mari au aga vei tea vasapinoakiana ki tea vei lala sigisigileo mau.

⁹A po pei pusa, aga wo da p̃olagati nawokagu mau; Nalakena nigo ku mari a.

¹⁰P̃a mari naatugiana anigo ega m̃elu dua ki nau pano: Kinau a siri‐nopu nalakena nawokatiana ni nam̃elearum̃a.

¹¹Ragi waina ku do parati naatam̃oli ki navasakasuaana maga nalakena namarinaleotageleana, Ku do mari tea masauniana aneana e do sara‐puoli dakiusi tuluki sikai: Lomau sara naatam̃oli eu pei tea p̃alo. Selah.

¹²P̃a rogo natapasavasaana aginau, Yehovah O, go p̃a takidorogo nakuapiosoana aginau; P̃a ta punuta paki naririmatagu maga mau: Nalakena kinau a pei nam̃enaki sikai sikoti ko, Nam̃enaki‐atatoko sikai, dakiusi tamagu maga mamau puti.

¹³P̃a leleo p̃ota ki nau pano, naga aga marasike, Ega vea ki aga vano, po da doko mau.