Read Nguna Togoa Etafe North SALAMO 40 Bible Online

SALAMO 40 - Nguna Togoa Etafe North bible

SALAMO 40

¹Salamo sikai ki David. A do leogoro leogoro Yehovah; Go e daki paki nau, po dogo nakuapiosoana aginau.

²Go e mari au a sake m̃elu dua ki m̃orutano sikai ni namarisakiana, m̃elu dua ki nalepa ni naruku; Go e mari nam̃elegu ero lawodu vatu laketoko sikai, po lawokilaketoko navasiana aginau maga.

³Go e doropusi nalegaana vau sikai e doko nawokagu, nasamasamaniana paki Sup̃e anigida: Tea laapa euga wo punusi a, po mataku, Go euga wo pavatu Yehovah.

⁴Ae namaropaana ki naatam̃oli waina e mari Yehovah e pei tea vavatuana aneana, Po da dum̃ana doa e paki tea leomadaga maga mau, go tea tawasi maga paki nasorosoroana mau!

⁵Yehovah Sup̃e aginau O, nigo ku mari tea laapa, tea ni namagaana anigo maga, Go namidodoana anigo maga paki gami: Eu marisap̃o pei tea ovarakiana paki‐go; Aga wo dogorogo ki da po pasa ara, ma Eu laapa liu tea veveataeana.

⁶Naviriana go navituaana ku da maro ara mau; Ku turisai nadaligagu maga: Naviriana tap̃arakiana go naviriana nalakena namarinaleosaana ku da datago ara mau.

⁷Nalakena tea wanogoe a naga, P̃a leo, a umai; E pei tea midiriana nalo kakagu nalulukiana ni tusi:

⁸A maro naga aga mari namasauana anigo, Sup̃e aginau O; Go nawotaeana anigo e doko m̃aleoputo ni namaritagu.

⁹A dogorogo ki namarinaleoleanaana nasaisaiana warua; P̃a leo, aga wo da dip̃agoro nagolegu maga mau, Yehovah O, nigo ku atae a.

¹⁰A da dasuru ki namarinaleoleanaana anigo m̃aleoputo ni nap̃op̃ogu mau; A noa naveilomauana anigo go namautipauriana anigo: A da dasuru ki nadodomiana anigo go nalomauana anigo paki nasaisaiana warua mau.

¹¹Nigo, Yehovah O, p̃a wo da mauti namaritadodomiana anigo maga kiagu mau: Nadodomiana anigo go nalomauana anigo eroga wo pavaigoro au sara ragi.

¹²Nalakena nasaana maga eu dalivirigoro au pa pa eu marisap̃o pei tea veveana, Namarinaleotageleana aginau maga eu pa parati ki nau, go a marisap̃o leosai; Eu laapa liu napati maga ni nalolu ni nap̃augu, go nap̃op̃ogu e doropusi au.

¹³P̃a suasua, Yehovah O, naga p̃a vualua au: Yehovah O, p̃a mari m̃araverave naga p̃a silae au.

¹⁴Euga vei taua maliere po matamaliere Tea maga waina eu do laaga naatagu naga euga mari puoli ki nia: Euga vei tea mariana euga liliu pano po pei tea dododaoana Tea maga waina eu do maro nasaana aginau.

¹⁵Euga vei maso maladi nalakena namaliereana adeada Tea maga waina eu do noa ki nau, Aha, Aha.

¹⁶Tea maga mamau puti waina eu do laaga ako euga to sokamidi po do laelaea ako: Tea maga waina eu do dodomi namautipauriana anigo euga to noa sara ragi, Yehovah ega vei tea warua.

¹⁷Go kinau a pei tea rogokitesa go tea tika; Ma Nawota e midoa ki nau: Nigo ku pei nasilae‐au‐ana go tea vualua au; Sup̃e aginau O, p̃a ta mari daliali mau.