Read Nguna Togoa Etafe North SALAMO 41 Bible Online

SALAMO 41 - Nguna Togoa Etafe North bible

SALAMO 41

¹Salamo sikai ki David. Ae namaropaana ki tea waina e do midoa ki tea tika! Yehovah ega wo pualua e naaleatia ni nasaana.

²Yehovah ega wo pavaigoro e, po mauti a ega wo mauri doko, go ega wo pei tea mariana ega risu p̃ia navanua; Go p̃a ta pitua ki nia paki namasauana ki tea kokona ki nia maga mau.

³Yehovah ega wo silae e nawewele saragoroana ni namanainaiana; Ku p̃elesidoa nawewele mamau aneana nasasanaana aneana.

⁴Kinau a naga, Yehovah O, p̃a dodomi au: P̃a maripauri naatagu; nalakena a mari naleo sa paki‐go.

⁵Tea kokona kinau maga eu do noa tea sa nalo kakagu, eu naga, Nagasa ega wo mate, go nagisana ega wo puoli?

⁶Go e pe umai naga ega vunusi au, e pe wo pasa nasorosoroana; Nap̃op̃ona e do saisai ki namarinaleotageleana dum̃ana paki nia: Ragi waina ega wo dave paki katama, ega wo pasa asa.

⁷Tea maga mamau puti waina eu pilosi au eu do pasadalakolako dum̃ana paki da dip̃a au: Eu do midoa ki dip̃a au tea sa paki nau.

⁸Eu naga, Nasasanaana sa sikai e sikoti a: Go nae waina e one ega wo da moro duleana mau.

⁹Go naatam̃oli ni natam̃ateana aginau, waina a pavatu asa, waina e gani navinaga aginau, Nae ma e sike nam̃ago ni nam̃elena kup̃e au.

¹⁰Ma nigo, Yehovah O, p̃a dodomi au, go p̃a sike au aga tuleana, Go aga wo lagati dua ra.

¹¹A atae pae tea waia naga ku maro au, Nalakena tea kokona ki nau e da kola‐laelaea dap̃au au mau.

¹²Go kinau, ku silae au doko nawialuaana aginau, Go ku mari au a lawodu narae ni naraem̃a pa pa e du mau du.

¹³Yehovah, Sup̃e ki Israel, ega vei tea vasap̃iakiana, Pae tuai waina e pano pa pa po paki tuai waina ega wo umai. Amen, go Amen.