Read Nguna Togoa Etafe North SALAMO 43 Bible Online

SALAMO 43 - Nguna Togoa Etafe North bible

SALAMO 43

¹P̃a vasap̃otae au, Sup̃e O, go p̃a vululu navululuana aginau paki nalauna waina eu da dodomi mau: P̃a vualua au m̃elu dua ki naatam̃oli ni namarisoreana go ni namarinaleotageleana.

²Nalakena nigo ku pei Sup̃e ni p̃aaka aginau; ekasana ku dip̃adoa au? Ekasana a do malepu pano nalakena nariesokiana ki tea kokona?

³P̃a tip̃akilua namarama anigo go nalomauana anigo umai; nara eroga maraki au: Eroga viragi au paki tava tapu anigo, Go paki nasum̃a‐tokoana anigo maga.

⁴Go aga wo paloti paki wede ni naviriana ki Sup̃e, Paki Sup̃e, nalaelaeaana warua liu aginau. Go aga wo samasamani ko ki harp sikai, Sup̃e O, Sup̃e aginau.

⁵Ekasana ku do kolo pakitano, naatagu O? Go ekasana ku do dotorosova doko au? P̃a to leogoro Sup̃e: nalakena aga wo moro pasadodom̃ata ki nia, Waina e pei namautipauriana maga ni naraegu, go Sup̃e aginau.