Read Nguna Togoa Etafe North SALAMO 44 Bible Online

SALAMO 44 - Nguna Togoa Etafe North bible

SALAMO 44

¹Salamo sikai ki Korah natuna maga. Maskil. Sup̃e O, au dogo ki nadaligagami maga, tamagami maga eu dogorogo ki nia paki gami, Nawosiana waina ku p̃osiwosi ki nia naaleatia adeada maga, naaleatia maga ni tuai.

²Nigo ku kopasilua nalauna maga ki nam̃elearum̃a, go ku lawo ki da; Ku marisa ki narei maga, go ku saikip̃elesa ki da.

³Nalakena eu da dapepeani navanua ki lova adeada mau, Go naruda e da madeada mari namautipauriana mau: Nalakena e pei nam̃elearum̃a ni matua, go narum̃a, go namarama ni naraem̃a, Nalakena ku saup̃ia ki da.

⁴Nigo ku pei Nawota aginau, Sup̃e O: P̃a tip̃a ki namautipauri‐Yakobana maga.

⁵Auga wo dip̃a pae ako tea riesoki gami maga: Auga wo pasi pae nagisam̃a tea maga waina eu duleana dip̃a gami.

⁶Nalakena aga wo da pavatu naasu aginau mau, Go lova aginau ega wo da mautipauri au mau.

⁷Nalakena ku mautipauri gami m̃elu dua ki tea riesoki gami maga, Po mari tea vilosi gami maga eu maliere.

⁸Au lega‐samasamani Sup̃e naaleatia mamau, Go auga wo pasadodom̃ata ki nagisam̃a pa pa ega tu mau du. Selah.

⁹Ma ku po dip̃adoa gami, po mari gami au pei tea dododaoana; Go ku da sikoti taua aginami maga pano mau.

¹⁰Ku do mari gami au liliu atutaku ki tea kokona: Go tea vilosi gami maga eu do dum̃ada madeada dape pavakoto.

¹¹Ku pitua ki gami au dakiusi shiip waina euga vei navinaga; Go ku daperavera ki gami m̃aleoputo ni nalauna maga.

¹²Ku sori p̃alo ki narei anigo, Go ku da mari nasogolapaana anigo e p̃arua ki naulu maga ni navakokotoana kakada mau.

¹³Ku mari gami au pei tea vasapinoakiana ki tea maga waina eu doko m̃aladigi ki gami, Tea vasasaudoakiana go tea vasadaoana ki tea maga waina eu doko dalivirigoro gami.

¹⁴Ku mari gami au pei naluluakiana sikai m̃aleoputo ni nalauna maga, Tea ligiligip̃aukiana sikai m̃aleoputo ni narei maga.

¹⁵Naaleatia mamau nadododaoana e doko kivea ki nau, Go namaliereana ni naraegu e dap̃augoro au,

¹⁶Nalakena nadaleo ni tea vasapinoa go ni tea vivisuori; Nalakena narae ni tea kokona go ni tea sikosiko.

¹⁷Tea maga mamau puti wanogoe eu pakilina ki gami; go au da malio ki‐go mau, Go au da mari sorosoro paki navasasokiana anigo mau.

¹⁸Nap̃op̃ogami e da liliu pano mau, Go navasiana aginami maga eu da dawasi m̃elu dua ki napua anigo mau;

¹⁹Waina ku marip̃oraworae gami tokora ni koria mila maga, Po dap̃augoro gami ki melu ni namateana.

²⁰Au pe malio ki nagisa ni Sup̃e aginami, Po darasike nam̃elearugami maga paki sup̃e p̃ota sikai,

²¹Sup̃e e pe wo da leousiusi tea wanogoe kite? Nalakena nae e atae tea tasurukiana maga ni nap̃op̃ogami.

²²Nalakena au pei tea maripunueana naaleatia mamau nalakena nigo; Au pei tea midoakiana naga au dapala shiip waina euga vei tea maripunueana.

²³P̃a tarapa, ekasana ku maturu, Nawota O? P̃a leleo, p̃a ta dip̃adoa gami pa pa ega tu mau du mau.

²⁴Ekasana ku dasuru ki naraem̃a, Po malio ki narogokitesaana aginami go nariesoki‐gami‐ana?

²⁵Nalakena naatagami e kolo paki nam̃otam̃ota: Nap̃elegami e puluti natano.

²⁶P̃a tuleana p̃a maginami pei nasilaeana, Go p̃a taulua gami nalakena nadodomiana anigo.