Read Nguna Togoa Etafe North SALAMO 45 Bible Online

SALAMO 45 - Nguna Togoa Etafe North bible

SALAMO 45

¹Salamo sikai ki Korah natuna maga. Maskil. Nalegaana sikai ni tea dodomiana maga. Nap̃op̃ogu e sarasarape ki navasaana wia sikai: Kinau a do noa nawosiana aginau maga agi Nawota: Namenagu e pei pen ki tea midiri m̃araverave sikai.

²Ku pei raewiaraewia liu naatam̃oli natuna maga; Nasaup̃iaana e pei tea takiana paki nagolem̃a maga: Nalakena tea wanogoe Sup̃e e pasap̃ia ki‐go pa pa e du mau du.

³P̃a oti soki lova anigo namaom̃a, tea marimatua O, Nadodomadaganiana anigo go natatap̃auana anigo.

⁴Go p̃a valoti natatap̃auana anigo, p̃a vagi kariot pano, Nalakena nalomauana go namatemateana go namarinaleoleanaana: Go nam̃elearum̃a ni matua ega wo digipisei ki‐go tea mataukiana maga.

⁵Nalua anigo maga eu makali; Nalauna maga eu dowo pakitano ki‐go; Eu makali nam̃o ni tea maga waina eu kokona ki nawota.

⁶Malo tasake anigo, Sup̃e O, e du du po du mau du: Tiko ni naleanaana e pei tiko ni namarakiana anigo.

⁷Ku dodomi namarinaleoleanaana, po pilosi nasigisigileoana: Nalakena tea wanogoe Sup̃e, Sup̃e anigo, e puvurai ki‐go Ki naroro ni nalaelaeaana p̃arua liu tam̃a ri maga.

⁸Sugoro anigo maga mamau puti eu nap̃o ki murra, go aloe maga, go kassia; Dave nasum̃a warua maga ni napati ni elefant, eu dave ara mari ko ku laelaea.

⁹Nawota natuda nagoroi maga eu pei tea dodomadaganiana anigo maga seara kakada: Nawota nagoroi e lawodu pisari nam̃elearum̃a ni matua e suni kold ni Ofir.

¹⁰P̃a rogo, natuna nagoroi, go p̃a leopunusi, go p̃a ta ki nadaligam̃a; Go p̃a malio ki namatarau anigo maga, go nasum̃a ki tamam̃a;

¹¹Go nawota ega wo masau naveiraewiaana anigo: Nalakena nae e pei nawota anigo; go p̃a suai natano paki nia.

¹²Go Tair natuna nagoroi ega wo paloti pilake navituaana sikai; Tea vei sogolapa maga ni narei euga wo pavarani naraem̃a.

¹³Nawota natuna nagoroi ekopu ni nasum̃a e pei tea samasamaniana puti: Sugoro aneana e pei tea vausiana sarisari kold.

¹⁴Ega wo suni tea midimidiria maga pei tea marakiana umai punusi nawota: Nagoroi atara maga tana ri maga waina eu dausi a Euga wo pei tea viragiana umai punusi ko.

¹⁵Euga wo pei tea marakiana umai pilake nalaelaeaana go nasokamidiana: Euga wo umai paki ekopu ni nasum̃a warua ki nawota.

¹⁶Natum̃a naanoai maga euga wo doko oli tamam̃a maga, Waina p̃a wo mari ra euga wo pei tea maraki maga maramana mamau.

¹⁷Aga wo mari nagisam̃a ega vei tea midoakiana sara tagona go tagona: Nalakena tea wanogoe nalauna maga euga wo pasadodom̃ata ki‐go pa pa ega tu du po du mau du.