Read Nguna Togoa Etafe North SALAMO 50 Bible Online

SALAMO 50 - Nguna Togoa Etafe North bible

SALAMO 50

¹Salamo sikai ki Asaf. Yehovah, Sup̃e, Tea Kasua mau e pasa, Po soso maramana pae nasakeana ni elo pa pa paki namusuana kakana.

²Pae Sion, nawialuaana ni naleom̃atakiana, Sup̃e e maramalaga dave.

³Sup̃e anigida ega wo umai, go ega wo da punuta mau: Nakapu sikai ega wo ganikani naraena, Go ega wo atu p̃arua dalivirigoro e.

⁴Ega wo pioso paki nakoroatelagi maga elagi, Go paki maramana, naga ega vasap̃otae narei aneana:

⁵Kuga saisai ki tea dodomi‐dodomiana aginau maga euga umai punusi au; Tea maga waina eu mari navasasokiana sikai paki nau pilake naviriana.

⁶Go nakoroatelagi maga euga wo dogorogo ki namarinaleoleanaana aneana; Nalakena Sup̃e nae e pei tea vasap̃otae. Selah.

⁷Kuga rogo, narei aginau O, go aga wo pasa; Israel O, go aga wo noasokisoki paki‐go: Kinau a pei Sup̃e, Sup̃e anigo.

⁸Aga wo da pasakasua ki‐go nalakena naviriana anigo maga mau; Go naviriana tap̃arakiana anigo maga eu doko kivea ki nau sara ragi.

⁹Aga wo da dape kau natuna tureai sikai m̃elu dua ki nasum̃a anigo mau, Go naninani anoai maga m̃elu dua ki loga anigo maga mau.

¹⁰Nalakena sara nalo mauri ni mala ni nakau eu pei aginau, Nalo tuavati maga waina eu doko tava maga ni manu sikai.

¹¹A atae manu maga mamau puti ni tava maga: Go nalo mila maga ni namalasi eu sikoti au.

¹²A pe vitolo a pe ta noa ki‐go asa mau: Nalakena maramana e pei aginau, go navuraana kakana.

¹³Aga kani nap̃okasi ni kau natuda tureai maga, Po munu nada ni naninani anoai maga kite?

¹⁴P̃a tua Sup̃e naviriana ni navasadodom̃atakiana; Go p̃a lagati‐dua Tea Vakilagi mau nasaiana anigo maga:

¹⁵Go p̃a vioso paki nau naaleatia ni nariesokiana; Aga wo pualua ko, go p̃a wo samasamani au.

¹⁶Ma Sup̃e e noa ki tea sigisigileo, e naga, Nigo p̃a kasa ki nia naga p̃a rogorogo ki natawonakiana aginau maga, Go naga p̃a tape navasasokiana aginau paki nawokam̃a?

¹⁷Go nigo ku pilosi natapavanauana, Po nadi ki navasaana aginau maga paki natakum̃a.

¹⁸Ragi waina ku punusi tea vanako, ku suasua ki nia, Go tea veanip̃otaeana anigo e sikoti tea maripele maga.

¹⁹Ku pitua ki nawokam̃a paki tea sa, Go namenam̃a e do pausi nasorosoroana.

²⁰Ku do dasake po do pasa dip̃a taim̃a; Ku do pasa dosiva ki natu ni p̃ilam̃a.

²¹Ku mari tea maga wanogoe, go a punuta doko; Ku midoa ki nia naga a pei tea takiusi ko: Ma aga wo pasakasua ki‐go, po ovara ki da narae ni namatam̃a maga.

²²Kuga midoaki tea wanogoe tea malio ki Sup̃e maga, a pavarani mu asa, A pe vua‐p̃oraworae mu, go tea vualua e pe tika:

²³Tea waina e do pitua ki naviriana ni navasadodom̃atakiana e do samasamani au; Go tea waina e do mari m̃ata ki napua aneana. Aga wo pisei ki nia namautipauriana ki Sup̃e.