Read Nguna Togoa Etafe North SALAMO 51 Bible Online

SALAMO 51 - Nguna Togoa Etafe North bible

SALAMO 51

¹Salamo sikai ki David: ragi waina profeta Nathan e umai punusi a, edaku ki e paki ekopu punusi Bath‐sheba. P̃a saup̃ia ki nau, Sup̃e O, ega vae nadodomiana anigo: P̃a kasilua natapiriana aginau maga ega vae nalapalapaana ni namaritadodomiana anigo maga.

²P̃a sarue parati kinau m̃elu dua ki namarinaleotageleana aginau, Go p̃a mari au aga tautau m̃elu dua ki namarinaleosaana aginau.

³Nalakena kinau a atae natapiriana aginau maga: Go namarinaleosaana aginau e doko kivea ki nau sara ragi.

⁴A mari naleo sa paki‐go sikim̃a, Po mari tea sa namatam̃a maga: Naga p̃a leana ragi waina p̃a wo pasa Po dautau ragi waina p̃a wo pasap̃otae.

⁵P̃a leo, a pakilina namarinaleotageleana; Go p̃ilagu e dumau ki nau namarinaleosaana.

⁶P̃a leo, ku masau nalomauana tokora maga ni nap̃alaugu: Go p̃a wo mari au aga atae namanumatuaana tokora surukiana.

⁷P̃a wo meseura paki nau ki husop, go aga wo dautau: P̃a wo sarue au, go aga wo dare liu sno.

⁸P̃a wo mari au aga rogo nakatakataana go nalaelaeaana; Go navatu maga waina ku marip̃oroworosi ra euga wo sokamidi.

⁹P̃a tasuru ki naraem̃a paki namarinaleosaana aginau maga, Go p̃a kasilua namarinaleotageleana aginau maga mamau puti.

¹⁰P̃a maginau dawona ki p̃op̃o tautau, Sup̃e O; Go p̃a maripau ki naatana laketoko nap̃alaugu.

¹¹P̃a ta nadi ki nau m̃elu dua ki naraem̃a pano mau; Go p̃a ta dapelua Naatana Tapu anigo kiagu mau.

¹²P̃a maginau piragi nalaelaeaana ni namautipauriana anigo ega liliu umai: Go p̃a silae au ki naatana suasua sikai.

¹³Go aga wo pasapisei ki tea tapiri maga napua anigo maga; Go tea mari naleo sa maga euga wo liliu umai punusi ko.

¹⁴P̃a vualua au m̃elu dua ki sogi ni nada, Sup̃e O, Sup̃e ni namautipauri‐au‐ana; Go namenagu ega wo kola‐laelaea namarinaleoleanaana anigo.

¹⁵Nawota O, p̃a wo p̃olagati nagolegu maga; Go nawokagu ega wo dogorogo ki nasamasamani‐ko‐ana.

¹⁶Nalakena ku da masau naviriana mau; kite a pe vitua ki nia: Ku da maro naviriana tap̃arakiana mau.

¹⁷Naviriana maga ki Sup̃e eu pei naatana maworawora: P̃op̃o maworawora go tea marip̃oroworosiana, Sup̃e O, p̃a wo da midoakip̃alo ki nia mau.

¹⁸P̃a marim̃ata ki Sion nasaup̃iaana anigo: P̃a wo davagi nakoro maga ni Yerusalem.

¹⁹Ragi wanogoe p̃a wo masau naviriana maga ni namarinaleoleanaana, naviriana tap̃arakiana go naviriana tap̃arakiana mamau: Ragi wanogoe euga wo pitua ki kau natuda tureai maga wede ni naviriana anigo.