Read Nguna Togoa Etafe North SALAMO 52 Bible Online

SALAMO 52 - Nguna Togoa Etafe North bible

SALAMO 52

¹Maskil ki David: ragi waina Doec nawora ni Edom e umai po noakisai Saul, po noa ki nia, David e po umai paki nasum̃a ki Ahimelek. Ekasana ku do pasapakavakae tea sa, tea marimatua O? Nadodomiana ki Sup̃e e doko naaleatia mamau.

²Namenam̃a e do midoa ki namarisakiana maga; Dakiusi tea masi nalolu makali sikai waina e do mari namarisoreana.

³Ku dodomi tea sa p̃arua liu tea wia; Go nasorosoroana p̃arua liu naga p̃a vasa namarinaleoleanaana. Selah.

⁴Ku dodomi navasaana maga mamau puti ni natinomiana, Namena ni namarisoreana O.

⁵Sup̃e ega wo dakai ko pa pa ega tu mau du, Ega wo dapelua ko, po putilua ko m̃elu dua ki tap̃aup̃au anigo, Po paku dakati ko m̃elu dua ki navanua ni tea mauri maga. Selah.

⁶Go tea leana maga euga wo punusi a, go euga wo mataku, Go euga wo muru ki nia, euga wo naga,

⁷Kuga leo, nae e pei naatam̃oli waina e da mari Sup̃e e pei p̃aaka aneana mau, Ma e do pavatu nawaruaana ni nasogolapaana aneana, Po do kasua ki namarisakiana aneana.

⁸Ma kinau, a dakiusi nakau oliva malakesa sikai ekopu ni nasum̃a ki Sup̃e: A pavatu nadodomiana ki Sup̃e waina e du du po du mau du.

⁹Aga wo pasadodom̃ata ki‐go pa pa ega tu mau du, nalakena ku mari a: Go aga wo do leogoro nagisam̃a, nalakena e p̃ia, narae ni tea dodomi‐dodomiana anigo maga.