Read Nguna Togoa Etafe North SALAMO 53 Bible Online

SALAMO 53 - Nguna Togoa Etafe North bible

SALAMO 53

¹Maskil ki David. Tea vei lala sigisigileo e noa nap̃op̃ona, e naga, Sup̃e e dika. Eu marisaki, go eu mari namarinaleotageleana mamaragokiana; Tea mari naleo p̃ia e dika.

²Sup̃e e leo siwo pae nakoroatelagi paki naatam̃oli natuda maga, Naga ega vunusi te naata e pe toko waina e midoakiatae, Waina e laaga Sup̃e.

³Eu mamau puti liliu pano; eu pei taua malasi; Tea mari naleo p̃ia e da doko mau, tea sikai maau sa e dika.

⁴Tea maga waina eu do mari namarinaleotageleana eu da atae kite? Waina eu do gani narei aginau dapala waina eu gani navinaga, Po da pioso paki Sup̃e mau.

⁵Tokora wanogoe eu mataku p̃arua asa, waina tea mataukiana e da doko asa mau: Nalakena Sup̃e e daperavera ki navatu maga ni tea waina e m̃enaki dip̃a ko; Ku mari ra eu maliere, nalakena Sup̃e e dip̃adoa ra.

⁶Sei ega wo pitua ki namautipauriana paki Israel maga pae Sion umai? Ragi waina Sup̃e ega wo piragi liliua ki narei aneana waina eu pei tea viragiluapavakotokiana, Yakob ega wo sokamidi, go Israel ega wo laelaea.