Read Nguna Togoa Etafe North SALAMO 55 Bible Online

SALAMO 55 - Nguna Togoa Etafe North bible

SALAMO 55

¹Maskil ki David. P̃a takidorogo natapasavasaana aginau, Sup̃e O; Go p̃a ta dum̃am̃a dasuru ki‐go paki navavaraniana aginau mau.

²P̃a rogo au, go p̃a vasadara au: A do pakaro namidodoana aginau, go a do gi;

³Nalakena nadaleo ni tea kokona, Nalakena narae ni nariesokiana ki tea sigisigileo; Nalakena eu do nadi ki namarinaleotageleana paki nau, Go eu do kopalele au namaetoana.

⁴Nap̃op̃ogu e do pitinu p̃arua nap̃alaugu: Go namatakuana maga ni namateana eu dowo au.

⁵Namatakuana go narurururuana ero pakilina ki nau, Go nasaram̃akotoana e dap̃augoro au.

⁶Go a naga, Sei ega wo dua au nalivaru maga dakiusi tokopea? A pe riri pano, po maromaro doko.

⁷P̃a leo, a pe sava paki uvea, A pe toko masop̃alo doko. Selah.

⁸A pe mari m̃araverave naga aga m̃elu pano. Pa dua ki nalagi waina e sava kasua go waina e atu.

⁹P̃a tinomi, Nawota O, p̃a tap̃otae namenada: Nalakena a punusi namaripavakotoana go navileana natokoana.

¹⁰Aleati go p̃ogi ero do daliviri ki nia nakoro kakana maga: Go namarinaleotageleana go narogokitesaana ero doko m̃aleoputo kakana.

¹¹Namarisakiana maga eu doko m̃aleoputo kakana: Go natapepavakotoana go namarisoreana ero da m̃elu dua ki napua welewelea kakana mau.

¹²Nalakena e da pei tea kokona mau waina e pasapinoa ki nau; Kite a pe soki a: E da pei tea vilosi au mau waina e mari paka laapa paki nau; Kite a pe tokoloku pa dua ki nia pano:

¹³Ma e pei nigo, naatam̃oli waina toro pitotowo, Tea sikoti au, go tea ataeana aginau.

¹⁴Waina toro dua mari navusum̃akiana lolo, Toro surata roara ni nasum̃a ki Sup̃e sikoti taua.

¹⁵Namateana ega wo pa parati ki da m̃araverave, Euga wo mauri siwo paki Sheol pano: Nalakena tea sa maga eu doko natokoana adeada, eu doko nap̃alauda.

¹⁶Kinau, aga wo pioso paki Sup̃e; Go Yehovah ega wo mautipauri au.

¹⁷Ragi melu, go malip̃ogi, go aleati matua, aga wo midodoa, po gi: Go e po dogo nadaleogu.

¹⁸E daulua naatagu paki natam̃ateana m̃elu dua ki navakalo waina e dip̃a au: Nalakena tea maga waina eu mari au eu laapa.

¹⁹Sup̃e ega wo dogo, po pasadara ra, Nae waina e doko tuai, Selah Naatam̃oli maga waina eu da pano p̃ota mau, Go waina eu da matau ki Sup̃e mau.

²⁰E sai ki nam̃elearuna maga dip̃a tea maga waina eu doko dam̃ate paki nia: E dapiri navasasokiana aneana.

²¹Nawokana e m̃om̃oaa dakiusi batar, Ma nap̃op̃ona e pei navakalo: Navasaana aneana maga eu m̃arasarasa liu naroro, Ma nara eu pei lova sailuaana maga.

²²P̃a nadi paki Yehovah ki tea waina e dua ko asa, go nae ega wo pakale ko: Ega wo da pitua ki tea leana naga ega varivari mau pa pa ega tu mau du.

²³Go nigo, Sup̃e O, p̃a wo mari ra euga wo siwo paki m̃orutano ni namarisakiana: Naatam̃oli ni nada go ni namarisoreana euga wo da mauri doko pa pa paki namagovai ni naaleatia adeada maga mau; Ma kinau aga wo pavatu ako.