Read Nguna Togoa Etafe North SALAMO 56 Bible Online

SALAMO 56 - Nguna Togoa Etafe North bible

SALAMO 56

¹Salamo sikai ki David: Miktam: ragi waina Filistine maga eu puasoki a Cath. P̃a saup̃ia ki nau, Sup̃e O, nalakena naatam̃oli e do marodip̃a au: Naaleatia mamau e do marimari diesoki au.

²Tea kokona ki nau maga eu marodip̃a au naaleatia mamau: Nalakena tea maga waina eu do mari au naleomadagaana eu laapa.

³Naaleatia waina a mataku asa, Kinau aga wo pavatu ako.

⁴Aga wo samasamani Sup̃e nalakena navasaana aneana: A pavatu Sup̃e, aga wo da mataku mau; Nap̃okasi ega wo mari au nasava?

⁵Naaleatia mamau eu do p̃elukidoa navasaana aginau maga: Namidodoana adeada maga mamau puti eu pei tea sa dip̃a au.

⁶Euga wo saisai, euga wo dokoloku, Nara, tea kusugoro au maga, euga wo pavaigoro, Dapala waina eu leogoro sua naatagu.

⁷Eu peani navualuaana pae namarinaleotageleana. P̃a mari nalauna maga euga vakitano namaetoana anigo, Sup̃e O.

⁸Ku peve navasaraana aginau maga: Nigo p̃a toropusi naririmatagu maga napura ni noai anigo; Eu da doko tusi anigo kite?

⁹Naaleatia waina aga wo pioso asa ragi wanogoe tea kokona ki nau maga euga wo liliu pano: A atae tea waia, naga Sup̃e e pei aginau.

¹⁰Aga wo samasamani Sup̃e nalakena navasaana aneana: Aga wo samasamani Yehovah nalakena navasaana aneana.

¹¹A pavatu Sup̃e, aga wo da mataku mau; Naatam̃oli ega wo mari au nasava?

¹²Nasaiana aginau maga paki‐go eu one au one, Sup̃e O: Aga wo lagatidua ko naviriana ni navasadodom̃atakiana maga.

¹³Nalakena ku pualua naatagu m̃elu dua ki namateana: P̃a wo da pualua nam̃elegu maga m̃elu dua ki natosivakiana kite? Naga aga surata narae ni Sup̃e Namarama ki tea mauri maga.