Read Nguna Togoa Etafe North SALAMO 58 Bible Online

SALAMO 58 - Nguna Togoa Etafe North bible

SALAMO 58

¹Salamo sikai ki David: Miktam. Ku do pasa namarinaleoleanaana lomau ragi waina ku pei pusa kite? Ku do pasap̃otae leana kite, naatam̃oli natuda maga O?

²Ee, ma ku do mari namarinaleotageleana maga nap̃op̃omu; Ku do dowogi namaripavakotoana ni nam̃elearumu maga navanua.

³Tea sigisigileo maga eu do dawasi pae nasum̃a ni kanao: Eu do sasap̃o pae nap̃ele, eu do pasa nasorosoroana.

⁴Eu pilake noai ni namateana waina e dakiusi noai ni namateana ni m̃aata sikai: Eu dakiusi adder p̃aro waina e p̃onoti nadaligana;

⁵Waina ega wo da dogo nadaleo ni tea vasatalakolako mau, Waina e do pasa m̃om̃osi manumatua.

⁶Sup̃e O, p̃a marip̃ori napatida nawokada: P̃a marip̃orilua napati warua ni laion tureai maga, Yehovah O.

⁷Euga sara puoli dakiusi noai waina e sara pano: Ragi waina ega vuap̃elua ki nalua aneana maga, euga tapala eu pe vei tea worikotoviana.

⁸Euga tapala sneil waina e do sara po puoli: Dapala tea solapesiana ki nagoroi sikai waina e da punusi elo mau.

⁹Ragi waina lasa veni animu maga euga ko da dogo nakapu makalikali mau, Ega wo sasaralua ra ki nalagi atu sikai, tea mata go tea vavaga euga mamau.

¹⁰Tea leana ega wo laelaea nalakena e punusi nasikosikoana: Ega wo sarue nam̃elena maga nada ni tea sigisigileo.

¹¹Go naatam̃oli maga euga wo naga, Lomau nawa agi tea leana e doko: Lomau Sup̃e sikai e doko waina e do pasap̃otae maramana.