Read Nguna Togoa Etafe North SALAMO 59 Bible Online

SALAMO 59 - Nguna Togoa Etafe North bible

SALAMO 59

¹Salamo sikai ki David: Miktam: ragi waina Saul e dip̃akilua, go eu pavaigoro nasum̃a naga euga maripunue a. P̃a vualua au m̃elu dua ki tea kokona kinau maga, Sup̃e aginau O: P̃a wo sike au pakilagi m̃elu dua ki tea maga waina eu duleana dip̃a au.

²P̃a vualua au m̃elu dua ki tea maga waina eu do mari namarinaleotageleana, Go p̃a mautipauri au m̃elu dua ki naatam̃oli maga ni nada.

³Nalakena, p̃a leo, eu kusugoro raki naatagu; Tea kasua maga eu do saisai dip̃a au: Natapiriana aginau kite namarinaleosaana aginau e da pei nalakena mau, Yehovah O.

⁴Eu do sava po do dum̃ada lawo ki da, namarinaleotageleana aginau e dika: P̃a tarapa naga p̃a sua au, go p̃a vunusi.

⁵Go nigo, Yehovah O, Sup̃e ki taua maga, Sup̃e ki Israel, P̃a tuleana naga p̃a umai punusi nalauna maga mamau puti: P̃a ta saup̃ia ki tea marimalauweluki sigisigileo seara mau. Selah.

⁶Euga wo liliu ragi melu, euga wo marip̃arai dapala koria sikai, Go euga wo daliviri ki natokoana.

⁷P̃a leo, eu do lua ki nawokada; Lova maga eu doko nagoleda: Nalakena sei e do dogo? Eu noa e.

⁸Go nigo, Yehovah O, p̃a wo muru ki da; P̃a wo mari saudoa ki nalauna maga mamau puti.

⁹Nakasuaana aneana, aga wo pavaigoro e raki‐go: Nalakena Sup̃e e pei tokora vakilagi aginau.

¹⁰Sup̃e ni nadodomi‐au‐ana ega wo pea ki nau: Sup̃e ega wo mari au aga leopunusi tea kokona ki nau maga.

¹¹P̃a ta maripunue ra mau, narei aginau eu pe malio ki nia: P̃a mari ra euga vasara ki namarimatuaana anigo, go p̃a mari ra euga vakitano. Nakokoro aginami, Nawota O.

¹²Namarinaleosaana ni nawokada, navasaana ni nagoleda, Go euga wo pei tea vuasokiana naleomadagaana adeada, Go nalakena navivisaana go nasorosoroana waina eu do noa e.

¹³P̃a maripuoli ki da namaetoana, p̃a maripuoli ki da, naga euga ta doko mau: Go naatam̃oli maga euga atae naga Sup̃e e do maramara doko Yakob, Pa pa paki namatap̃ago maga ni maramana. Selah.

¹⁴Go euga liliu ragi melu, euga marip̃arai dapala koria sikai, Go euga taliviri ki natokoana.

¹⁵Nara euga wo pasara naga euga kanikani, Eu pe ta puka mau eu pe wo m̃enaki.

¹⁶Ma kinau aga wo lega nakasuaana anigo; Go aga wo kola‐laelaea nadodomiana anigo malip̃ogi: Nalakena ku maginau pei tokora vakilagi sikai, Go tokora ni nasavasiliana naaleatia ni nariesoki‐au‐ana.

¹⁷Nakasuaana aginau O, aga wo lega‐samasamani ko: Nalakena Sup̃e e pei tokora vakilagi aginau, Sup̃e ni nadodomi‐au‐ana.