Read Nguna Togoa Etafe North SALAMO 6 Bible Online

SALAMO 6 - Nguna Togoa Etafe North bible

SALAMO 6

¹Salamo sikai ki David. Yehovah O, p̃a ta pasa kasua ki nau namaetoana anigo mau, Go p̃a ta parati au namaritausuana anigo mau.

²P̃a saup̃ia ki nau, Yehovah O; nalakena kinau a malaulau: Yehovah O, p̃a maripauri au; nalakena navatugu maga eu m̃anaunau.

³Go naatagu e m̃anaunau p̃arua: Go nigo, Yehovah O, seve ragi?

⁴P̃a liliu umai, Yehovah O, p̃a vualua naatagu: P̃a mautipauri au nalakena nadodomiana anigo.

⁵Nalakena namidoa‐ki‐go‐ana e da doko namateana mau: Sei ega wo pasadodom̃ata ki‐go Sheol?

⁶A mawosa ki nagiana aginau; Sara nap̃ogiana a do mari nawewele aginau e sale; A do mari nawewele saragoroana aginau e sara ki naririmatagu maga.

⁷Namatagu e m̃odave nalakena nap̃op̃osaana. E pei tea tuai nalakena tea kokona ki nau maga mamau puti.

⁸Kuga m̃elu dua ki nau pano, tea mari namarinaleotageleana maga mamau puti; Nalakena Yehovah e dogo nadaleo ni natagiana aginau.

⁹Yehovah e dogo navavaraniana aginau; Yehovah ega wo piragi natapasavasaana aginau.

¹⁰Tea kokona ki‐nau maga mamau puti euga wo maliere po m̃anaunau p̃arua: Euga wo liliu pano, euga wo maliere m̃araverave.