Read Nguna Togoa Etafe North SALAMO 65 Bible Online

SALAMO 65 - Nguna Togoa Etafe North bible

SALAMO 65

¹Salamo sikai. Nalegaana sikai ki David. Natatam̃ateana nasamasamaniana, Sup̃e O, e manigo doko Sion: Go nasaiana ega wo pei tea lagati‐pituakiana paki‐go.

²Tea rogo natapasavasaana O, Sara naatam̃oli euga wo paloti punusi ko.

³Navasaana maga ni namarinaleotageleana maga eu kasua liu au: Natapiriana aginami maga, nigo p̃a wo dap̃augoro ra.

⁴Ae namaropaana ki tea waina p̃a wo matadoa e, po piragi a paloti paki m̃aladigi, Naga ega toko roara anigo maga! Auga wo maro nawiaana ni nasum̃a anigo, Tokora tapu ni nasum̃a warua anigo.

⁵P̃a wo pasadara gami ki tea mataukiana maga pae namarinaleoleanaana, Sup̃e O, ni namautipauri‐gami‐ana; Ku pei tea vavatuaana ki tea maga ni namatap̃ago maga mamau puti ni maramana, Go ki tea maga ni natasi waina eu madu uvea:

⁶E do lawokilaketoko tava maga ki nakasuaana aneana; E pei tea tasokiana ki namarimatuaana:

⁷E do mari nasaruruana ni natasi maga e datam̃ate, nasaruruana ni napeao kakada maga, Go nap̃agaagaana ni nalauna maga.

⁸Go tea maga waina eu doko tokora maga ni uvea mau eu matau ki navaivaiana anigo maga: Ku do mari natavepanoana maga ni malip̃ogi go ni ragi melu eu kola‐laelaea.

⁹Ku do umai punusi maramana, po do pue a, Ku do mari a e pei sogolapa p̃arua; Nap̃ap̃a ki Sup̃e e pura ki noai: Ku do madeada mari korn ragi waina ku marim̃ataki sua navanua dapala nogoe.

¹⁰Ku do pue p̃arua ki nasalena maga; Ku do mari sula kakana maga eu matemate: Ku do mari a e manainai ki usa walapa maga; Ku do pasap̃ia ki navisouana kakana.

¹¹Ku do p̃auvau ki natau ki nawiaana anigo; Go napua anigo maga eu do lawo ki nam̃aladua.

¹²Eu do lawo napega maga ni masop̃alo: Go tava maga eu pei tea tasokiana ki nalaelaeaana.

¹³Napega maga eu pei tea sugoroana ki navata maga; Nap̃aloa maga eu pei tea tap̃augoroana ki korn; Eu do pioso laelaea, go eu do lega.