Read Nguna Togoa Etafe North SALAMO 66 Bible Online

SALAMO 66 - Nguna Togoa Etafe North bible

SALAMO 66

¹Nalegaana sikai, Salamo sikai. Kuga marip̃arai‐laelaea paki Sup̃e, maramana mamau:

²Kuga lega nasamasamaana ni nagisana: Kuga tua e nadodomadaganiana, nasamasamani‐a‐ana.

³Kuga noa ki Sup̃e, Nawosiana anigo maga eu pei tea mataukiana pa! Nalakena nawaruaana ni nakasuaana anigo tea kokona ki‐go maga euga wo doko etano paki‐go.

⁴Maramana mamau euga wo suai natano paki‐go, Go euga wo lega ki‐go; Euga wo lega nagisam̃a. Selah.

⁵Kuga vano, po punusi nawosiana maga ki Sup̃e; E pei tea mataukiana namariana aneana paki naatam̃oli natuda maga.

⁶E doa natasi e pei natano garagara: Euga wo surata duagoto noai sara ki nam̃eleda: Tuga wo laelaea asa tokora wanogoe.

⁷E do maramara ki namarimatuaana aneana pa pa e du mau du, Namatana ero do leopunusi nalauna maga: Tea p̃auluulu maga euga ta marosake mau. Selah.

⁸Narei maga, kuga vasap̃ia ki Sup̃e aginami, Go kuga mari nadaleo ni nasamasamani‐a‐ana ega vei tea rogoana:

⁹Waina e do mari naatagida e mauri doko, Go e da pitua ki nam̃elegida naga ega va‐parasai mau.

¹⁰Nalakena ku po maridogo gami, Sup̃e O; Ku po mari gami au sara, dapala waina silver e pei tea mariana e sara.

¹¹Ku piragi gami paki kup̃ena; Ku doropusi tea madaga nawaregami.

¹²Ku mari naatam̃oli maga eu sakesaake horse paki nap̃augami; Au rumai paki nakapu go paki noai maga; Go ku po piragi gami au dave umai paki nasogolapaana.

¹³Aga wo paloti paki nasum̃a anigo pilake naviriaana tap̃arakiana maga, Aga wo lagati‐dua ko nasaiana aginau maga,

¹⁴Waina nagolegu ero noa ra, Go waina nawokagu e pasa ara ragi waina a doko nariesokiana.

¹⁵Aga wo dua ko naviriana tap̃arakiana maga ni tea m̃anopunopu maga, Pilake tea ni nap̃o wia ni shiip anoai maga; Aga wo mari naviriana ni oks maga go ni naninani anoai maga. Selah.

¹⁶Kuga umai, kuga rogo, tea maga mamau puti waina ku matau ki Sup̃e, Go aga wo dogorogo ki tea waina e magi naatagu mari a.

¹⁷A pioso paki nia ki nawokagu, Go nasamasamanipakilagikiana e doko etano ni namenagu.

¹⁸A pe vunusi namarinaleotageleana nap̃op̃ogu, Nawota e pe wo da dogo mau:

¹⁹Ma Sup̃e e po dogo lomau; E po dakidorogo nadaleo ni natapasavasaana aginau.

²⁰Sup̃e ega vei tea vasap̃iakiana, Waina e da dip̃adoa natapasavasaana aginau mau, go waina e da dapelua nadodomiana aneana m̃elu dua ki nau mau.