Read Nguna Togoa Etafe North SALAMO 67 Bible Online

SALAMO 67 - Nguna Togoa Etafe North bible

SALAMO 67

¹Salamo sikai, Nalegaana sikai. Sup̃e ega saup̃ia ki gami, po pasap̃ia ki gami, Go ega mari naraena ega maramalaga sikoti gami; Selah.

²Naga napua anigo ega vei tea ataeana maramana, Namautipauriana anigo m̃aleoputo ni nalauna maga mamau puti.

³Narei maga euga vasadodom̃ata ki‐go, Sup̃e O: Narei maga euga mamau puti pasadodom̃ata ki‐go.

⁴Nalauna maga euga laelaea po kola‐laelaea: Nalakena p̃a wo pasap̃otae leana ki narei maga, Go p̃a wo maraki nalauna maga waina eu doko maramana. Selah.

⁵Narei maga euga vasadodom̃ata ki‐go, Sup̃e O; Narei maga euga mamau puti pasadodom̃ata ki‐go.

⁶Navanua e pitua ki navinagana: Sup̃e, Sup̃e anigida, ega wo pasap̃ia ki gida.

⁷Sup̃e ega wo pasap̃ia ki gida; Go namatap̃ago maga mamau puti ni maramana euga wo matau ki nia.