Read Nguna Togoa Etafe North SALAMO 68 Bible Online

SALAMO 68 - Nguna Togoa Etafe North bible

SALAMO 68

¹Salamo sikai ki David, Nalegaana sikai. Sup̃e ega wo duleana, tea maga waina eu kokona ki nia euga wo pei daperavera; Go tea maga waina eu pilosi a euga wo sava dua ki naraena pano.

²Dapala waina naasu e pei tea suipuluakiana pano, p̃a wo suipulua ki da pano: Dapala waina waks e sara pa dua ki narae ni nakapu, Tea sigisigileo maga euga wo puoli pa dua ki narae ni Sup̃e.

³Ma tea leana maga euga wo laelaea; euga wo darasa narae ni Sup̃e: Go euga wo sokamidi ki nalaelaeaana.

⁴Kuga lega ki Sup̃e, kuga legasamasamani nagisana: Kuga magi tea waina e do sakesaake pano duaduru masop̃alo maga, kuga maneana nadi pakilagi ki napua toniana sikai; Nagisana e pei YAH; go kugararasa naraena.

⁵Tama ni namalepu maga, go tea vasap̃otae nagoroi malepu maga, Sup̃e waina e doko nasum̃atokoana tapu aneana.

⁶Sup̃e e do mari tea waina eu masikida doko eu doko nasum̃a: E do piragi tea soliana maga eu dave paki narisup̃iaana: Tea vei p̃auluulu maga eu masikida doko navanua garagara.

⁷Sup̃e O, ragi waina ku dave pano pea ki narei anigo, Ragi waina ku surata duaduru maso maladi; Selah.

⁸Maramana e durururu, Go nakoroatelagi maga eu lawolawo ki usa pa dua ki narae ni Sup̃e: Sinai waina, pa dua ki narae ni Sup̃e, Sup̃e ki Israel.

⁹Usa warua ni navituam̃olikiana maga ku sapura ki nia, Sup̃e O, Tea veaniana anigo ragi waina e mawosa, nigo ku lawokilaketoko asa.

¹⁰Navata anigo eu doko asa: P̃a wo magi tea rogokitesa marim̃ataki doko nawiaana anigo, Sup̃e O.

¹¹Nawota ega wo pitua ki navasaana: Nagoroi maga waina eu do dogorogo ki nia eu pei taua warua.

¹²Nawota maga ki taua maga euga wo sava pano, euga wo sava pano: Go nagoroi waina e doko nasum̃a ega wo dap̃otae tea vutiluapavakotoana.

¹³Ku pe wo one namawota ni loga maga ni shiip! Nalivaru maga ni tokopea ero pei tea vulutigoroana ki silver, Go nam̃au ni nalivaruna maga ki kold m̃onom̃ono.

¹⁴Ragi waina Tea Kasua mau e daperavera ki nawota maga asa, Sno e p̃owo Salmon.

¹⁵Tava ki Sup̃e, tava ni Bashan; Tava ni nap̃au ni tava maga, tava ni Bashan.

¹⁶Tava maga, nap̃au ni tava maga, ekasana ku leo roitoi ki Tava waina Sup̃e e masauna naga ega toko asa? Ioro, Yehovah ega wo doko asa pa pa ega tu mau du.

¹⁷Kariot maga ki Sup̃e eu pei tivilia dua, eu pei manu paka manu: Nawota e doko m̃aleoputo kakada, Sinai, go tokora tapu.

¹⁸Ku sake paki tokora ni elagi, ku piragilua pavakoto tea vua pavakotoana maga; Ku dape navituaana maga m̃aleoputo ni naatam̃oli maga, Go ni tea vei p̃auluulu maga, naga Yah Sup̃e ega toko tokora wanogoe.

¹⁹Nawota ega vei tea vasap̃iakiana, waina e do oli gida natapetapeana madaga sara naaleatia, Sup̃e waina e manigida pei namautipauriana. Selah.

²⁰Sup̃e e manigida pei Sup̃e ni namautipauriana maga; Go nataveana maga m̃elu dua ki namateana eu pei tea ki Yehovah Nawota.

²¹Ma Sup̃e ega wo p̃oka nap̃au ni tea kokona ki nia maga, Nam̃asua ni tea waina e do mari natapiriana aneana maga.

²²Nawota e naga, Aga wo piragi ra pae Bashan liliu umai, Aga wo piragi ra pae epua maga ni natasi liliu umai:

²³Naga nam̃elem̃a ega vasi nada, Naga namena ni koria anigo maga ega menae nada ni tea kokona ki‐go maga.

²⁴Eu punusi nasurataana anigo maga, Sup̃e O, Nasurataana maga ki Sup̃e aginau, Nawota aginau, paki tokora tapu.

²⁵Tea lega maga eu pea, tea woka nagalo maga eu edaku, M̃aleoputo ni nagoroi atara maga waina eu p̃oka timbrel maga.

²⁶Kuga vasap̃ia ki Sup̃e nasaisaiana maga, Ki Nawota, tea maga waina ku pei tea ni namata noai ni Israel.

²⁷Tokora wanogoe Benyamin kiki tea marimatua ki da, Tea maraki maga ni Yudah tea nadi ra ki vatu, Tea maraki maga ni Sebulon, tea maraki maga ni Naftali.

²⁸Sup̃e anigo e dawona ki nakasuaana anigo: Sup̃e O, tea waina ku maginami mari a, p̃a mari a ega kasua.

²⁹Nalakena nasum̃a tapu anigo elagi ki Yerusalem Nawota maga euga wo manigo dape navituaana maga umai.

³⁰P̃a vasa kasua ki nalo mila ni nap̃alau nau, Taua ni tea kasua anoai maga, pilake kau natuda maga ni narei maga, Naga euga suai natano pilake matele maga ni silver; E daperavera ki narei maga waina eu masau navakalo.

³¹Naatam̃oli warua maga euga wo pae Ityipt umai; Ethiopia ega wo mari m̃araverave naga ega sai ki nam̃elearuna maga paki Sup̃e.

³²Nalauna maga ni maramana, kuga lega ki Sup̃e; Kuga lega‐samasamani Nawota; Selah.

³³Waina e do sakesaake nakoroatelagi maga ni nakoroatelagi maga ni tuai pano; Kuga leo, e pitua ki nadaleona, nadaleona kasua.

³⁴Kuga vitua ki nakasuaana paki Sup̃e; Natatap̃auana aneana e dap̃augoro Israel, Go nakasuaana aneana e doko napopouru maga.

³⁵Sup̃e O, ku pei tea mataukiana m̃elu tokora tapu anigo maga: Sup̃e ki Israel, nae e do pitua ki nakasuaana go namarimatuaana paki narei aneana. Sup̃e ega vei tea vasap̃iakiana.