Read Nguna Togoa Etafe North SALAMO 69 Bible Online

SALAMO 69 - Nguna Togoa Etafe North bible

SALAMO 69

¹Salamo sikai ki David. Sup̃e O, p̃a mautipauri au; Nalakena noai maga eu rumai paki naatagu.

²A diro nalepa ni epua, waina nalawoduana e dika asa: A umai paki noai vakipua maga, go natave e dap̃augoro au.

³A mawosa ki naviosoana aginau; namanugu e garagara: Namatagu ero sirinopu ragi waina a do leogoro Sup̃e aginau.

⁴Tea maga waina eu pilosi m̃oli ki nau eu laapa liu napati ni nalolu ni nap̃augu: Tea maga waina eu naga euga taelua au, waina eu kokona ki nau pae nasorosoroana, eu kasua: Ragi wanogoe a pitua ki liliua ki tea waina a da putilua pavakoto asa mau.

⁵Sup̃e O, nigo ku atae naveilalaana aginau; Go natapiriana aginau maga eu da pei tea tasurukiana paki‐go mau.

⁶Tea maga waina eu do leogoro ako euga ta maliere nalakena kinau mau, Nawota, Yehovah ki taua maga O: Tea maga waina eu do laaga ako euga ta pei tea dododaoana nalakena kinau mau, Sup̃e ki Israel O.

⁷Nalakena a dapetape navasapinoakiana nalakena nigo; Nadododaoana e kovagoro naraegu.

⁸A po pei tea p̃ota paki taigu maga, Go tea ni navanua p̃ota paki p̃ilagu natuna maga.

⁹Nalakena nasuisuiana paki nasum̃a anigo e gani au; Go navasapinoaana maga ki tea maga waina eu pasapinoa ki‐go eu dowo paki nau.

¹⁰Ragi waina a kai, po parati naatagu ki navaliana, Eu pasapinoa ki nau asa.

¹¹Ragi waina a mari nakulukulu ni sak e pei tea suniana aginau, Eu pasalulua ki nau asa.

¹²Tea maga waina eu doko namatapua eu do pasapinoa ki nau; Go a pei nalegaana ki tea maga waina eu munu namunuana kasua.

¹³Ma kinau, natapasavasaana aginau e paki‐go, Yehovah O, ragi ni nasaup̃iaana: Sup̃e O, doko nalapalapaana ni nadodomiana anigo, P̃a vasadara au doko nalomauana ni namautipauriana anigo.

¹⁴P̃a vualua au m̃elu dua ki nalepa, go aga ta diro mau: Aga vei tea vualuaana m̃elu dua ki tea maga waina eu pilosi au, go ki noai vakipua maga.

¹⁵Natave ni noai maga ega ta dap̃augoro au mau, Go epua ega ta dinomi au mau; Go m̃orutano ega ta p̃ogoro nawokana au mau.

¹⁶P̃a vasadara au, Yehovah O; nalakena nadodomiana anigo e p̃ia: P̃a tum̃am̃a doa ko paki nau ega vae nalapalapaana ni namaritadodomiana anigo maga.

¹⁷Go p̃a ta dasuru ki naraem̃a paki tea suasua anigo mau; Nalakena a pei tea riesokiana; p̃a vasadara au m̃araverave.

¹⁸P̃a umai paki m̃aladigi ki naatagu, go p̃a taulua e: P̃a vualua au nalakena tea kokona ki nau maga.

¹⁹Nigo ku atae navasapinoaki‐nauana, go namaliereana aginau, go nadododao‐au‐ana: Tea maga waina eu do diesoki au eu mamau puti doko naraem̃a.

²⁰Navasapinoakiana e po mari p̃orae nap̃op̃ogu; go a dogo kitesa p̃arua: Go a leogoro te seara waina euga dodomi, ma sikai e da doko mau; Go tea vasapakavakale maga, ma a da pap̃ai te seara mau.

²¹Go eu pitua ki nakokonae e doko navinaga aginau; Go ragi waina a madou eu dua au waine kokona naga aga munugi a.

²²Wede adeada waina e doko naraeda ega vei kup̃ena sikai; Go ragi waina eu doko dam̃ate ega vei vaivai sikai.

²³Namatada euga maligo, naga euga ta leosai mau; Go p̃a mari nawareda euga to parivari sara ragi.

²⁴P̃a ta ki namaritausuana anigo paki‐da, Go navivitinuana ni namaetoana anigo ega va‐parati ki da.

²⁵Natokoana adeada ega vei tea mariana ega vei maso maladi; Go te naata ega ta doko tap̃aup̃au adeada maga mau.

²⁶Nalakena eu kopalele tea waina nigo ku p̃okati a; Go eu dogorogo ki nasusueana ki tea vuriana anigo maga.

²⁷P̃a vitua ki namarinaleotageleana paki namarinaleotageleana adeada: Go euga ta umai paki namarinaleoleanaana anigo mau.

²⁸Euga vei tea kasiluaana m̃elu dua ki tusi ni tea mauri maga, Go euga ta pei tea midiriana sikoti tea leana maga mau.

²⁹Ma kinau a dogokitesa, go a susue: Namautipauriana anigo, Sup̃e O, ega sike au pakilagi.

³⁰Aga wo samasamani nagisa ni Sup̃e ki nalegaana sikai, Go aga wo mari a ega warua ki navasadodom̃atakiana.

³¹Go ega wo p̃ia ki Yehovah liu oks sikai, Kite kau natuna tureai sikai waina e pilake napati dua ni nap̃auna go natap̃alakisi maga ni nam̃elena maga.

³²Tea matemate maga eu punusi a, go eu laelaea: Tea maga waina ku do laaga Sup̃e, nap̃op̃omu ega mauri.

³³Nalakena Yehovah e do dogo parati ki tea tika maga, Go e da midoakip̃alo ki tea soliana aneana maga mau.

³⁴Nakoroatelagi go maramana eroga samasamani a, Natasi maga, go sara naleo waina eu do kakaravi ara.

³⁵Nalakena Sup̃e ega wo mautipauri Sion, po davagi natokoana maga ki Yudah; Go euga wo doko tokora wanogoe doko po peani a.

³⁶Go naworawora ni tea suasua aneana maga euga wo peanipioli ki nia. Go tea maga waina eu dodomi nagisana euga wo doko asa.