Read Nguna Togoa Etafe North SALAMO 7 Bible Online

SALAMO 7 - Nguna Togoa Etafe North bible

SALAMO 7

¹Shiccaion ki David, waina e lega ki Yehovah asa, nalo ni navasaana maga ki Kush nawora ni Benyamin. Yehovah O, Sup̃e aginau, a sava sili ako: P̃a mautipauri au m̃elu dua ki tea maga mamau puti waina eu do kopalele au, go p̃a vualua au:

²E pe katip̃orae naatagu dakiusi laion sikai, Po puap̃oraworae a, go tea vualua e pe tika.

³Yehovah O, Sup̃e aginau, a pe mari tea waia; Namarinaleotageleana e pe toko nam̃elearugu maga;

⁴A pe lagati‐dua tea tam̃ate paki nau tea sa; (Go a pualua tea kokona ki m̃oli ki nau:)

⁵Tea kokona ega kopalele naatagu, po pa parati ki nia; Go ega vasi namauriana aginau paki natano, Po mari nasamasamaana aginau ega toko nam̃otam̃ota. Selah.

⁶P̃a tuleana Yehovah O, namaetoana anigo, P̃a tum̃am̃a sike ko pakilagi dip̃a namidiana ki tea kokona ki nau maga: Go p̃a maginau darapa; ku dip̃a ki navasap̃otaeana.

⁷Go nasaisaiana ni narei maga euga talivirigoro ko: Go p̃a liliu dap̃au ra umai paki malo ni elagi.

⁸Yehovah ega wo pasap̃otae narei maga: Yehovah O, p̃a vasap̃otae au ega vae namarinaleoleanaana aginau, go ega vae nawialuaana aginau waina e doko au.

⁹Nasaana ki tea sigisigileo maga ega makoto, a pavarani ko asa, go p̃a wo lawokilaketoko tea leana: Nalakena Sup̃e leana e do maridogo nap̃op̃o maga go nap̃elekevatu maga.

¹⁰Nakokoro aginau e doko Sup̃e, Waina e do mautipauri tea p̃op̃o leana maga.

¹¹Sup̃e e pei tea vasap̃otae leana, Go Sup̃e e maeto sara naaleatia.

¹²E pe ta liliu mau, e pe wo pakali lova aneana; E puap̃elua ki naasu aneana, po marim̃ata ki nia.

¹³Go e dutua ki naleo maga ni namateana paki nia; Ega wo mari nalua aneana maga euga vavaga.

¹⁴P̃a leo, e do pitivitinu ki namarinaleotageleana; Go e dumau ki namarisakiana, go ega wo piragi nasorosoroana.

¹⁵E kili m̃oru sikai, po mari a e pakipua, Go e dowo paki m̃orutano waina e do mari a.

¹⁶Namarisakiana aneana ega wo liliu paki nap̃auna, Go namaripavakotoana aneana ega wo siwo paki nam̃asuana.

¹⁷Aga wo pasadodom̃ata ki Yehovah ega vae namarinaleoleanaana aneana: Go aga wo lega‐samasamani nagisa ni Yehovah, Tea Vakilagi mau.