Read Nguna Togoa Etafe North SALAMO 71 Bible Online

SALAMO 71 - Nguna Togoa Etafe North bible

SALAMO 71

¹Yehovah O, a pavatu ako: Aga ta maliere mau pa pa ega tu mau du.

²P̃a wo pualua au doko namarinaleoleanaana anigo, po mari au aga m̃elu pano: P̃a ta ki nadaligam̃a paki nau, go p̃a mautipauri au.

³P̃a maginau pei vatulaketoko sikai ni natokoana, waina aga to paloti paki asa sara ragi: Ku pitip̃aki naga p̃a mautipauri au; Nalakena nigo ku pei vatulaketoko aginau go nasum̃a ni p̃aaka aginau.

⁴Sup̃e aginau O, p̃a vualua au m̃elu dua ki nam̃elearu ni tea sigisigileo, M̃elu dua ki nam̃elearu ni tea mari dagelegele go tea mari p̃aragoto.

⁵Nalakena nigo ku pei naleogoroana aginau, Nawota Yehovah O: Tea vavatuana aginau pae ragi ni naveinatureaiana aginau pa pa.

⁶A pei tea silaeana pae ako pae nap̃ele pa pa: Nigo ku pei tea waina ku piragi au a dave m̃elu dua ki namarita ni p̃ilagu: Nasamasamaniana aginau e doko ako doko sara ragi.

⁷A dapala tea ni namagaana sikai paki tea laapa; Ma nigo ku pei tokora ni nasavasiliana kasua aginau.

⁸Nawokagu ega wo pura ki nasamasamani‐ko‐ana, Go ki nadodomadagani‐ko‐ana naaleatia mamau.

⁹P̃a ta siva ki nau mau ragi ni naveiteamatuaana aginau; P̃a ta doropusi au mau ragi waina nakasuaana aginau e do sirinopu.

¹⁰Nalakena tea kokona ki nau maga eu noa nalo kakagu; Go tea maga waina eu do pavaigoro naatagu eu saisai pusum̃aki,

¹¹Eu do naga, Sup̃e e po doropusi a: Kuga sava dausi a po puasoki a; nalakena tea vualuae e dika.

¹²Sup̃e O, p̃a ta madu uvea ki nau mau: Sup̃e aginau O, p̃a mari m̃araverave naga p̃a silae au.

¹³Euga maliere go euga sirinopu tea maga waina eu do marikokona paki naatagu; Euga vei tea sugoroana ki navasapinoakiana go ki nadododaoana tea maga waina eu do laaga nasaana aginau.

¹⁴Ma kinau aga wo do leogoro sara ragi, Go aga wo do sokari sara nasamasamani‐ko‐ana.

¹⁵Nawokagu ega wo do dogorogo ki namarinaleoleanaana anigo, Go namautipauriana anigo naaleatia mamau; Nalakena a da atae naveveana kakada maga mau.

¹⁶Aga wo paloti pilake namarimatuaana maga ki Nawota Yehovah: Aga wo pasalagati namarinaleoleanaana anigo, anigo masikina.

¹⁷Sup̃e O, ku pasapisei ki nau pae ragi ni naveinatureaiana aginau pa pa; Go a do dogorogo ki nawosiana ni namagaana anigo maga pa pa paki ragi waia.

¹⁸Go ragi waina aga vei tea matua go aga kapuara, Sup̃e O, p̃a ta doropusi au mau; Pa pa aga rogorogo ki narum̃a paki tagona vau, Namarimatuaana anigo paki sara naata waina euga wo umai.

¹⁹Go namarinaleoleanaana anigo, Sup̃e O, e paki tokora ni elagi mau; Nigo waina ku mari tea warua maga, Sup̃e O, sei e dakiusi ko?

²⁰Nigo, waina ku mari gami au punusi nariesokiana laapa go nasaana maga, P̃a wo moro pakamauri ki gami, Go p̃a wo moro piragi gami auga m̃elu dua ki epua maga ni natano sake umai.

²¹P̃a wo mari nawaruaana aginau ega warua, Go p̃a wo dum̃am̃a doa ko po pasapakavakale au.

²²Go kinau aga wo pasadodom̃ata ki‐go ki naleo ni salteri sikai, Nalomauana anigo, Sup̃e aginau O: Aga wo legasamasamani ko ki harp sikai, Tea Tapu ki Israel O.

²³Nagolegu eroga wo kolalaelaea ragi waina aga wo legasamasamani ko; Go naatagu, waina ku daulua e.

²⁴Go namenagu ega wo noa namarinaleoleanaana anigo naaleatia mamau: Nalakena eu maliere, nalakena eu matamaliere tea maga waina eu do laaga nasaana aginau.