Read Nguna Togoa Etafe North SALAMO 72 Bible Online

SALAMO 72 - Nguna Togoa Etafe North bible

SALAMO 72

¹Salamo sikai ki Solomon. Sup̃e O, p̃a vitua ki navasap̃otaeana anigo maga paki nawota, Go namarinaleoleanaana anigo paki nawota natuna.

²Ega wo pasap̃otae narei anigo pae namarinaleoleanaana, Go tea rogokitesa anigo maga pae navasap̃otaeana.

³Tava warua maga euga wo magi narei dau ki natam̃ateana, Go tava kiki maga pae namarinaleoleanaana.

⁴Ega wo pasap̃otae tea rogokitesa maga ni narei, Ega wo mautipauri tea tika natuda maga, Go ega wo marip̃oraworae tea maripavakoto.

⁵Euga wo matau ki‐go ragi waina elo ega wo doko, Go ragi ni atelagi tagona ni tagona maga.

⁶Ega wo siwo umai dapala usa paki nam̃enau kotoviana: Dapala usa walapa maga waina eu pue navanua.

⁷Tea leana maga euga wo siria naaleatia aneana maga; Go nalapalapaana ni natam̃ateana pa pa atelagi ega wo nopu.

⁸Go ega wo maramara pae natasi pa pa paki natasi, Go pae Noaisara pa pa paki namatap̃ago maga ni maramana.

⁹Tea maga waina eu doko masop̃alo euga wo ditip̃atua naraena; Go tea maga waina eu kokona ki nia euga wo menae nam̃otam̃ota.

¹⁰Nawota maga ni Tarshish go ni naureure maga euga wo pitua ki nasautoga: Nawota maga ni Sheba go ni Seba euga wo dape navituaana maga umai.

¹¹Go nawota maga mamau puti euga wo suai natano paki nia. Nalauna maga mamau puti euga wo maneana suasua.

¹²Nalakena ega wo pualua tea tika ragi waina ega wo kuapioso; Go tea rogokitesa, waina e dika tea silae.

¹³Ega wo dodomi tea manainai go tea tika, Go ega wo mautipauri naata ni tea tika maga.

¹⁴Ega wo daulua naatada m̃elu dua ki natapepavakotoana go ki namaripavakotoana; Go nadada ega wo pei tea madaga namatana:

¹⁵Go ega wo mauri; go euga wo dua e te kold seara ni Sheba: Go euga wo maneana dapasavasa sara ragi; Euga wo pasap̃ia ki nia naaleatia mamau.

¹⁶Tea m̃imigoroana sikai ni korn ega wo doko navanua nap̃au ni tava maga; Nawana ega wo parivari dapala Lebanon: Go tea ni natokoana euga wo pum̃a dapala nam̃enau ni navanua.

¹⁷Nagisana ega wo doko pa pa ega tu mau du; Nagisana ega wo siria ragi waina elo ega wo doko: Go naatam̃oli maga euga wo pei tea vasap̃iakiana asa; Nalauna maga mamau puti euga wo soso e ki tea maropa.

¹⁸Yehovah Sup̃e, Sup̃e ki Israel, ega vei tea vasap̃iakiana, Waina e masikina do mari tea ni namagaana maga:

¹⁹Go nagisana ni nasamasamaana ega vei tea vasap̃iakiana pa pa ega tu mau du; Go maramana mamau ega vura ki nasamasamaana aneana. Amen, go Amen.

²⁰Natapasavasaana maga ki David, natu ni Yesse, eu nopu.